प्रमुख प्रतिपक्षी दल नेपाली कांग्रेसले सोमबार बसेको मन्त्रिपरिषद बैठकको निर्णयानुसार राष्ट्रपति विद्यादेवी भण्डारीबाट जारी भएका २ वटा अध्यादेश फिर्ता लिन दवाव दिने निर्णय गरेको छ ।
मंगलबार बसेको पार्टी पदाधिकारीहरुको बैठकले सरकारले संविधानको मूल मर्म, भावना विपरित अहिलेको परिस्थितिमा ल्याउन नहुने अध्यादेश ल्याएको ठहर गर्दै ती अध्यादेश फिर्ताका लागि दवाव दिने निर्णय गरेको हो ।
सरकारसँग प्रत्यक्ष संवाद तथा विभिन्न रचनात्मक विरोधका कार्यक्रमबाट अध्यादेश फिर्ताका लागि दवाव दिने निर्णय भएको कांग्रेस प्रवक्ता विश्वप्रकाश शर्माले जानकारी दिए ।
‘अहिले सडकमा गएर प्रदर्शन गर्ने अवस्था छैन । हामी पनि जिम्मेवार भएर प्रस्तुत हुनुपर्ने अवस्था छ,’ कांग्रेस प्रवक्ता शर्माले भने, ‘तर सामाजिक सञ्जालमार्फत यस बीचमा हजारौं साथीहरुले कालो झण्डाको प्रदर्शनी गरिरहनु भएको छ ।’
प्रवक्ता शर्माले सरकारको निर्णयानुसार जारी भएका अध्यादेशविरुद्ध पार्टीका भातृ तथा सुभेच्छु संस्थाहरुले पनि आफ्नो धारणा सार्वजनिक गर्ने जानकारी दिए ।