धनगढी । पहिलोपटक कालापानीको सीमा नाका १ नम्बर पिल्लर पुगेको सशस्त्र प्रहरी बलको गस्ती टोली फर्किएको छ ।
बीओपीका प्रमुख प्रहरी निरीक्षक लिलिबहादुर चन्द नेतृत्वको २५ जनाको टोली गस्ती १ नम्बर स्तम्भसम्म पुगेर फर्किएको सशस्त्र प्रहरी बल नेपाल नम्बर ५० गुल्म हेडक्वाटर दार्चुलाका डीएसपी डम्बरबहादुर विष्टले बताए ।
सरकारले दार्चुलाको छाङरुमा स्थापना गरेको बोडर आउट पोष्ट (बीओपी) को केही दिन अघि पहिलो पटक गस्तीका क्रममा कालापानीस्थित १ नम्बर पिल्लर पुगेको थियो । टोलीले यसअघि छाङरु आसपासको क्षेत्रमा मात्र गस्ती गर्दै आएको थियो ।
केहीदिन अघि सशस्त्र प्रहरी बलका आईजीपी शैलेन्द्र खनाल र प्रधानसेनापति पूर्णचन्द्र थापाको छाङरु भ्रमण गरेपछि सशस्त्र प्रहरी बलको टोलीले कालापानीको १ नम्बर पिलर पुगेको हो ।
भारतले कालापानी, लिपुलेक र लिम्पियाधुराको नेपाली भूमि मिचेर सडक बनाएपछि नेपालमा विरोध भएको थियो । भारतले नेपाली भूमि मिचेको विरोधभएसँगै नेपालले आफ्नो भूमि भारतले कालापानी, लिपुलेक र लिम्पियाधुरा समेटेर नयाँ नक्सा जारी गरिसकेको छ ।
सरकारले कालापानी, लिपुलेक र लिम्पियाधुरा सहितको आधिकारिक नक्सा जारी गरेपछि कालापानी क्षेत्रको सुरक्षा सतर्कता बढाइएको छ ।
गत बैशाख ३१ गते दार्चुलाको ब्यास गाउँपालिका १ स्थित छाङरुमा सशस्त्र प्रहरीको बोर्डर आउट पोस्ट (बीओपी) स्थापना गरिएको थियो ।