कोरोना संक्रमणका कारण भर्चुअल पढाईको प्रवृत्ति बढेसँगै मोबाइलको माग अधिक छ । मोबाइल पसल सामान्य दिनमा जस्तै व्यस्त छन् ।
लामो समयसम्म मोबाइल स्टकमा राख्नुपर्ने बाध्यता व्यवसायीलाई छैन । माग बढ्दा मोबाइल खरिदमा पहिलेजस्तो कुनै किसिमको छुट खरिदकर्ताले पाउने अवस्था छैन ।
मोबाइलको माग बढेको तथ्यलाई आयातले पनि पुष्टि गर्छ । भन्सार विभागका अनुसार चालु आर्थिक बर्ष २०७७र७८ को पहिलो चौमासिक अर्थात कात्तिकसम्म १४ अर्ब रुपैयाँभन्दा बढीको मोबाइल आयात भएको छ ।
यो अवधिमा मात्रै नेपालले २१ लख ९० हजार थान मोबाइल भित्र्याएको छ । मोबाइल आयातबापत सरकारले दुई अर्ब २४ करोड रुपैयाँ राजस्व पनि प्राप्त गरेको छ । नेपालले धेरै आयात गर्ने बस्तुको सूचीमा डिजेलपछि मोबाइल दोस्रो स्थानमा छ ।
भर्चुअल गतिविधिको फाईदा मोबाइल व्यापारलाई मात्र भएको छैन, यसले ल्यापटपको माग पनि बढाएको छ । विभागको तथ्यांक अनुसार कात्तिकसम्म दुई अर्ब ८ करोड रुपैयाँ बराबरको ३७ हजार ६०८ थान ल्यापटप आयात भएको छ ।