एक दिनमा २० टनभन्दा बढी फोहोर उत्पादन हुने सुदूरपश्चिमको राजधानी सहर धनगढीमा फोहोरमैला व्यवस्थापन केन्द्र स्थापना हुन सकेको छैन । डम्पिङ साइट निर्माणका लागि एसियाली विकास बैंक (एडीबी) ले चार वर्षअघि एक अर्बभन्दा बढी ऋण रकम प्रदान गरे पनि समयमा काम सम्पन्न हुन नसक्दा बर्सेनि फ्रिज हुँदै गएको छ ।
चालु आर्थिक वर्षमा धनगढी उपमहानगरपालिकाले फोहोरमैला व्यवस्थापनका लागि जग्गा उपलब्ध गराउन नसके एडीबीको ऋण सहयोग सधैंका लागि फिर्ता जाने आयोजना कार्यान्वयन एकाइका प्रमुख प्रवीण शाहले बताए ।
उनका अनुसार आर्थिक वर्ष २०७३/०७४ मा एडीबीले सुदूरपश्चिमका चारवटा नगरपालिका धनगढी, गोदावरी, शुक्लाफाँटा र भीमदत्त नगरपालिकाको क्षेत्रीय सहरको स्तरोन्नतिका लागि चारवटा प्याकेजमा करिब ९ अर्ब ऋण सहयोग उपलब्ध गराएको थियो ।
जसमध्ये दिशाजन्य पदार्थ तथा फोहोरमैला व्यवस्थापन केन्द्र निर्माणका लागि मात्रै २ अर्बभन्दा बढी रकम थियो । आयोजना प्रमुख शाहाले फोहोरमैला व्यवस्थापन केन्द्र निर्माणका लागि जग्गाको खोजीमा चार वर्ष बितेको बताए ।