पछिल्लो २४ घण्टामा कोरोना सङ्क्रमणका कारण एक जनाको ज्यान गएको छ । अस्ति बुधवार र बिहीवार कोरोनाबाट मृत्यु हुने सङ्ख्या शून्यमा झरेकोमा आज एक जनाको ज्यान गएको हो । योसहित नेपालमा सङ्क्रमणका कारण ज्यान गुमाउनेको सङ्ख्या ११ हजार नौ सय ५० जना पुगेको स्वास्थ्य तथा जनसङ्ख्या मन्त्रालयले जनाएको छ ।
यस्तै २४ घण्टामा ७७ जनामा कोरोना सङ्क्रमण पुष्टि भएको छ । पीसीआर र एन्टिजेन विधिबाट गरी सात हजार नौ सय ८१ जनाको नमुना परीक्षण गर्दा ७७ जनामा सङ्क्रमण पुष्टि भएको स्वास्थ्य मन्त्रालयले जनाएको छ ।
यही अवधिमा एक सय ८९ जना कोरोना सङ्क्रमणबाट मुक्त भएका छन् । अब नेपालमा पाँच हजार दुई सय १२ जना कोरोनाका सक्रिय सङ्क्रमित रहेका छन् ।