सुदूर पश्चिम प्रदेश मन्त्रीपरिषद को आजको बैठकले प्रदेश लोकमार्ग विधेयक २०७५ लाई देश सभामा दर्ता गर्न भौतिक पूर्वाधार विकास मन्त्रालयलाई अनुमति दिने निर्णय गरेको छ ।
मन्त्रीपरिषदको बैठकले भौतिक पूर्वाधार विकास मन्त्रालयले तयार गरेको प्रदेश लोकमार्ग विधेयक २०७५ लाई स्वीकृत गर्दै प्रदेश सभामा दर्ता गर्न अनुमति दिने निर्णय गरेको हो ।
मन्त्रीपरिषद बैठकपछि जानकारी दिँदै मुख्यमन्त्री त्रिलोचन भट्टका प्रमुख स्वकीय सचिव शिब ओलीले केही सडकलाई प्रदेश गौरबका सडक घोषणा गरिएकोले निर्माणमा सहजता लयाउन प्रदेश लोकमार्ग विधेयक तयार गरिएको र त्यसलाई मन्त्रीपरिषदले स्वीकृत गरेको बताउनुभयो ।
यस्तै मन्त्रीपरिषदको आजको बैठकले भूमि ब्यवस्था, कृषि तथा सहकारी मन्त्रालयले तयार गरेको कृषि यान्त्रीकिकरणका लागि साझेदारीमा कष्टम हायरिङ सेन्टर स्थापना तथा सञ्चालन कार्यविधि २०७५ लाई स्वीकृत गरेको छ ।
प्रदेश सरकारले बजेट भाषणमै कष्टम हायरिङ सेन्टर स्थापना गर्ने उल्लेख गरेको थियो ।