बैतडी । बैतडीको पुर्चौडी नगरपालिका लामनीमा चितुवाले आतंक मच्चाएको छ । करिब एक महिना देखि पुर्चौडी ८ लामनीमा चितुवाले आतंक मच्चाएको हो ।
एक महिना देखि लामनीमा चितुवाले आतंक मच्चाउदा समस्या भएको स्थानीय पिताम्बर जोशीले जानकारी दिए । गाउँमै पसेर चितुवाले गोठमा बाँधेका बाख्रा खाने गरेको उनले बताए । मंगलबार राती गाउँमा पसेको चितुवाले स्थानीय भुवन राज जोशीका पाँच ओटा बाख्रा मारेको उनले बताए ।
उनका अनुसार रातीको समयमा गोठमा पसेको चितुवाले दुइ ओटा खसि लगेर गएको र तीन ओटा बाख्रा मारेर गएको छ । यस्तै अर्का स्थानीय देव दत्त जोशीका चराउन जंगल लगेका दुइ बाख्रा चितुवाले खाएको बताइएको छ ।
चितुवाले बाख्रा मार्न थालेपछि अहिले स्थानीय किसानहरु चिन्तीत भएका छन् । चितुवाबाट घरपालुवा जनावर जोगाउन रातिको समयमा पहरा दिनुपर्ने अवस्था आएको स्थानीयहरुको दुखेसो छ । जंगलबाट चितुवा गाउँमा पसेर बाख्रा खान थाले पछि स्थानीयहरु अहिले त्रसित बनेका हुन् ।
गोठबाटै बाख्रा, खसी चितुवाले आक्रमण गरेर लैजान थालेपछि गाउँमा त्रास फैलिएको स्थानीय जोशीले बताए । चितुवाको बासस्थान नष्ट हुँदै गएपछि चितुवा मानवबस्तीमा पसेर आतंक मच्चाउन थालेको विज्ञहरुको भनाई छ ।