तिहारको अवसर पारेर शुक्रवारबाट प्रदर्शनमा आएको फिल्म ‘के घर के डेरा’ले हलमा दर्शकको चाप बढाउँदै लगेको छ । पहिलो दिन औसत अकुपेन्सी कायम गरेको फिल्म शनिवार देशभर हाउसफुल भयो । आइतवार भने फिल्मको व्यापार केही खुम्चियो । तर, सोमवारबाट तिहार-छठ विदा सुरु भएपछि फिल्मले व्यापारमा उछाल ल्याएको छ । यसको प्रमाण मंगलवारको व्यापार हो ।
मंगलवार विहानदेखि देशको सबैभन्दा ठूलो मल्टीप्लेक्स चेन क्यूएफएक्समा फिल्मले प्राप्त गरेका शोजहरुमा दर्शकको उपस्थिति बलियो देखिएको छ भने राजधानीका अन्य ठूला मल्टीप्लेक्सहरु एफक्यूब, बिग मुभिज, वान सिनेमाज्, विएसआर, क्यूज सिनेमाज्, आइएनआई सिनेमाज्मा पनि दर्शकको चाप उल्लेख्य छ । मोफसलका मल्टीप्लेक्स तथा सिंगल स्क्रिनमा पनि अवस्था सुखद् छ ।
निर्देशक दीपेन्द्र के. खनालले फिल्मलाई मिलेको दर्शकको साथले आफू उत्साहित भएको बताए । उनले भने, ‘कुनै बेला राजेश हमाल, निखिल उप्रेती, विराज भट्टको फिल्म चल्दा हलमा जस्तो हुटिङ र सिठी बज्थ्यो, अहिले हलमा त्यही अवस्था छ । तिहार विदा सुरु भएसँगै हलमा दर्शक बढेका छन् भने व्यापारमा उछाल आएको छ । सम्भवतः केही दिनमा फिल्मको लगानी उठ्नेछ ।’
अभिनेता विपिन कार्कीले बलियो ‘वर्ड अफ माउथ’का कारण फिल्मले दर्शकको उत्साहजनक साथ पाउन सफल भएको बताउँछन् । उनले भने, ‘हलमा दर्शक रमाइलो गर्न जान्छन् । यो फिल्मले दर्शकलाई भरपुर रमाइलो प्रदान गर्न सक्ने सामर्थ्य राखेको छ । सोही कारण फिल्मले दर्शकको साथ मिलेको हो ।’ उनले आफ्नो चरित्र र अभिनयको प्रशंसा भएकोमा खुसी व्यक्त गरेका छन् ।
फिल्ममा विपिनका अलावा दयाहाङ राई, सुरक्षा पन्त, वर्षा राउत, रविन्द्र झा, लक्ष्मी गिरी, कोशिश क्षेत्री, आशान्त शर्मा, प्रभाकर न्यौपाने, सरोज अर्याल, भोलाराज सापकोटा, बाल कलाकार आयुषा ढकाललगायतको अभिनय छ । महेश दवाडीको पटकथा तथा संवाद रहेको यस फिल्मका कार्यकारी निर्माता युवराज कार्की हुन् भने निर्मातामा शरद श्रेष्ठ, राजीब श्रेष्ठ र किरण महर्जन छन् ।