प्रदेश बिपद जोखिम न्यूनीकरण तथा ब्यवस्थापन सम्बन्धी विधेयकलाई चाँडो पारित गर्नका लागि प्रदेश सभा सचिवालयमा प्रदेश सभा सञ्चालन नियमावलीको नियम निलम्बन गर्न प्रस्ताव दर्ता भएको छ ।
प्रदेश सभाको सत्तापक्ष नेकपाका सचेतक अक्कल रावलले प्रमुख प्रतिपक्षी दल नेपमली कांग्रेसका सासंद श्यामलाल राना थारुको समर्थनमा सभा सञ्चालन नियमावली २०७४ को नियम ११० निलम्बन गर्न प्रस्ताव दर्ता गर्नुभएको छ ।
नियम ११० मा प्रदेश सभामा सामान्य छलफल भएपछि विधेयक माथि संशोधनको प्रस्ताव गर्न समय सीमा तोकिएको छ । सो नियम निलम्बन गरिदिएपछि विधेयकलाई निर्णयार्थ सभामा पेश गर्न सहज हुन्छ ।
प्रदेश सभा सञ्चालन नियमावलीकै नियम २१६ मा कुनै विधेयक चाँडो पारित गर्नुपर्ने अवस्था आएमा संशोधनको प्रस्ताव राख्नसक्ने समय सीमा तोकिएको नियम निलम्बन गर्न सकिने ब्यवस्था छ ।
प्रदेश सभाको बुधबारको बैठकमा सभामुख अर्जुन बहादुर थापाले नियम निलम्बन गर्ने सम्बन्धी प्रस्ताव सचिवालयमा दर्ता भएको जानकारी गराउनुभएको छ ।
नियम निलम्बन सम्बन्धी प्रस्तावमा बिहीबार छलफल हुने र सो प्रस्तव पारित भए बिपद जोखिम न्यूनीकरण तथा ब्यवस्थापन सम्बन्धी विधेयक पनि बिहीबारको सभा बैठकबाट पारित हुने बाटो खुल्ने छ ।