निर्माता तथा निर्देशक सन्तोष सेनले बनाउन लागेको नयाँ फिल्म ‘बलिदान’मा नायक सौगात मल्ल फाइनल भइसकेका छन् । फिल्मका लागि अझै केही कलाकार फाइनल गर्न बाँकी छ ।
फिल्मको प्रि टिजर सार्वजनिक भएसँगै विभिन्न कलाकारहरूलाई राख्न दर्शकहरुले सुझाव दिइरहेका छन् । यसमा सबै भन्दा अगाडि नायक विराज भट्टको नाम आएको छ ।
दर्शकले विराजको नाममा सुझाव दिए पनि निर्माणपक्षले उनीसँग कुनै कुराकानी भने गरेको छैन । विशेषगरि, तराइ र पहाडको कथामा तयार हुन लागेको यो फिल्मले एक युग नायक जन्माउने अपेक्षा गरिएको छ ।
फिल्मको कथामा विराज निकै सुहाउने भन्दै दर्शकले प्रतिक्रिया दिइरहेका छन् । तर, नायक विराज भट्ट भने आफ्नै होम प्रोडक्शनको फिल्मको तयारी गरिरहेका छन् । फिल्म ‘साङ्लो’ निर्देशन गरेका भट्टले नयाँ फिल्म बनाउने तयारी गरिरहेको वुझिएको छ ।
स्रोतका अनुसार, विराज यो फिल्मबाट आफ्नै छोरालाई फिल्म क्षेत्रमा डेब्यू गराउने तयारीमा छन् । तर, उनले आन्तरिक तयारीको विषयमा पनि केही बोलेका छैनन् ।
विराजको क्रेज भोजपुरी फिल्म क्षेत्रमा उच्च छ । यदि, सन्तोषले उनलाई ‘बलिदान’मा अनुबन्धित गरे भने, भोजपुरी फिल्म नगरीमा व्यापारको बाटो खुल्नेछ । सन्तोष भने पौष महिनाबाट फिल्मको छायांकन सुरु गर्ने गरि आन्तरिक तयारीमा छन् ।