नेकपा अध्यक्ष केपी ओली र प्रचण्डले सचिवालय बैठकमा ७७ वटै जिल्लामा इन्चार्ज र सहइन्चार्जसहित एक सय ४४ जनाको सूची प्रस्तुत गरेका छन्। दुई अध्यक्षले आइतबार र सोमबारको गृहकार्यपछि मंगलबार बिहान बालुवाटारमा वरिष्ठ नेता माधवकुमार नेपालसँग परामर्श गरेका थिए ।
तर, नेपालले मन्त्री र सांसदबाहेक जिल्लामा सिनियर केन्द्रीय सदस्यमध्येबाट छनोट गर्ने मापदण्डलाई आधार मान्नुपर्ने अडान राखेपछि सहमति हुन नसकेको हो । अध्यक्षद्वयको प्रस्तावमा भने मन्त्री र सांसदहरूलाई पनि इन्चार्ज र सहइन्चार्जको प्रस्ताव गरिएको छ । असहमतिकै बीचमा दिउँसो ३ बजेबाट सुरु भएको सचिवालय बैठकमा पनि निष्कर्ष ननिस्किएपछि बुधबार पुनः बैठक बोलाइएको नेताहरूले बताए ।
बैठकमा अध्यक्ष ओलीले प्रदेश इन्चार्ज र सहइन्चार्ज, पदाधिकारी तथा जिल्ला संयोजक–सचिवको छनोट गर्दा ‘दोहोरो जिम्मेवारी नहुने’ मापदण्ड लागू नगरिएकाले जिल्ला इन्चार्ज र सहइन्चार्ज छनोटमा मात्र फरक मापदण्ड लागू हुन नसक्ने अडान राखेका थिए । तर, ओलीको भनाइप्रति प्रतिवाद गर्दै नेपालले जिल्ला नेतृत्व साबिक कमिटीका पदाधिकारीमध्ये वरिष्ठलाई छनोट गरिएकाले दोहोरो जिम्मेवारी नहुने गरी सबैले स्विकार्न सक्ने ‘सिनियर’ केन्द्रीय सदस्यमध्येबाट इन्चार्ज र सहइन्चार्ज तोक्नुपर्ने अडान राखेको एक नेताले बताए । यसमा प्रचण्ड भने माैन देखिएकाे खबर नयाँ पत्रिका दैनिकमा छापिएकाे छ ।