धनगढी । सुदूरपश्चिम प्रदेश सभा सदस्य प्रकाश बम धनगढी उपमहानगरपालिका वडा नम्बर ५ मा आफनै घरमा बस्दै आएका छन् । कैलाली क्षेत्र नम्बर ४ (२) बाट निर्वाचित बमले धनगढीमै घर भएपनि घर भाडा लिने गरेका छन् ।
उनले मासिक १७ हजार घर भाडा लिने गरेको प्रदेश सभा सचिवालयले जनाएको छ ।
प्रदेश सभा पदाधिकारी तथा सदस्यको सेवा सुविधा सम्बन्धी ऐनमा भनिएको छ –‘सभामुख र उपसभामुख बाहेकका अन्य पदाधिकारी तथा सदस्यले प्रदेश राजधानीमा आफनो घर नभएमा आवास सुविधा तथा फर्निचर वापत रकम पाउने छन् ।’
तर, धनगढीमै घर भएर पनि प्रदेश सभा सदस्यहरुले घर भाडावापतको रकम लिइरहेका छन् ।
नेपाली काँग्रेसबाटै समानुपातिक तर्फ निर्वाचित समानुपातिकतर्फकी प्रदेश सभा सदस्य हुन डम्मरी महरा (रक्षा) । उनको पनि धनगढीमै घर रहेको छ । तर, प्रदेश सभा सचिवालयले उपलब्ध गराएको विवरणमा उनले घर भाडा वापतको रकम लिने गरेको पाइएको छ ।
ऐनको आवास सम्बन्धि व्यवस्थाको ७ नम्बरमा भनिएको छ –‘नीजि घरमा बस्ने पदाधिकारी तथा सदस्यलाई आवास सुविधा दिइने छैन तर, नीजि आवास मर्मत सम्भार वापतको रकम दिइने छ ।’
सो अनुसार धनगढीमै घर भएका तीन प्रदेश सभा सदस्यहरुले वार्षिक घर मर्मत घर मर्मत खर्च लिएका छन् । ऐनको अनुसूचि १ बमोजिम प्रदेश सभा सदस्य तथा नेकपा एकीकृत समाजवादी पार्टीका दलका नेता दीर्घबहादुर सोडारी, नेकपा एमालेका धर्मराज पाठक र सन्तोषकुमारी शर्माले घर मर्मतबापत वार्षिक ३५ हजार बुझ्ने गरेका छन् ।
धनगढीमै घर भएका प्रदेश सभा सदस्यहरु मन्त्री र राज्यमन्त्री भएकाले उनीहरुले राज्यकोषबाट पाउने सुविधा लिइरहेका छन् । प्रदेशका भौतिक विकास मन्त्री प्रकाश देउवा आफनै घरलाई आवास बनाएर बसेका छन् भने उद्योग, पर्यटन, वन तथा वातावरण मन्त्री रमेश धामी मन्त्रालयको निवास प्रयोग गरिरहेका छन् । धनगढीमै घर भएकी सोही मन्त्रालयकी राज्यमन्त्री गितादेवी माल पनि हु्न् ।
प्रदेश सभा सचिवालयका अनुसार धनगढी घर नभएको भन्दै आएको निवेदनका आधारमा घर भाडावापतको खर्च उपलब्ध गराउँदै आएको छ । सूचना अधिकारी युवराज जैशीले भने –‘तीन प्रदेश सभा सदस्यबाहेक अन्यले घर नभएको भन्दै निवेदन दिएका छन् । अन्य सबैले घर भाडाबापतको रकम लिइरहेका छन् ।’
प्रदेश सभाको वार्षिक एक करोड आवासमा खर्च
सरकारले प्रदेशको राजधानी धनगढीमा बाहिरका सांसदका लागि घर भाडा बापतको सुविधा रकम उपलब्ध गराउँदै आएको छ ।
प्रदेश सभा सदस्यहरुलाई मासिक १७ हजार, समिति सभापति, दलका नेतालाई १८ हजार, विपक्षी दलका नेतालाई २० हजारका दरले घर भाडा उपलब्ध गराउँदै आएको छ ।
यस अनुसार प्रदेशमा घर भाडा र घर मर्मतमा वार्षिक एक करोड बढी रकम प्रदेश सभा सदस्यहरुले गर्ने गरेको देखिन्छ ।
योसंगै प्रदेश सभा सदस्यहरुको पारिश्रमिक, बैठक भत्ता, फर्निचर खर्च, धारा विजुली, सञ्चार सुविधा, दैनिक भत्ता, भ्रमण भत्ता, अतिथि सत्कार र यातायात खर्च लगायतमा प्रदेश सभा सचिवालयको खर्च रहेको छ ।
यो संगै प्रदेश सभा सदस्यहरुका स्वकीय सचिवहरुको खर्च पनि प्रदेश सभाबाटै व्यहोरिने गरेको छ ।
‘अन्य सुविधा नियम अनुसारनै गइरहेको छ । तर, घर भाडावापतको रकममा प्रदेश सभा सचिवालयले निरुत्साहन गर्न सकिरहेको छैन्’ सूचना अधिकारी जैशीले भने ।