कतारका राजा शेख तामिम विन हमद अल थानी अप्रिल तेस्रो साता नेपाल भ्रमणमा आउने तय भएसँगै मन्त्रालयहरू सम्झौताको खाका तय पार्न व्यस्त छन् । परराष्ट्र मन्त्रालयले अय मन्त्रालयसँग सम्झौताका विषयवस्तु र मन्त्रालयका आवश्यकताहरूबारे राय मागेको छ ।
परराष्ट्र मन्त्रालय स्रोतका अनुसार अप्रिल २३ मा आएर २४ मा फर्किने वा २४ मा आएर २५ मा फर्किनगरी दुवै मितिको बारेमा छलफल भएको छ । कतार नेपालीहरूको श्रम बजार रहेकाले त्यहाँको राजाको भ्रमणलाई उच्च महत्व दिइएको छ । भ्रमणका क्रममा केही सम्झौतामा हस्ताक्षरको तयारीसमेत छ ।
कतारले नेपालको खेल क्षेत्र र त्यसमा पनि फुटबलमा लगानी गर्ने गरेको छ । खेलकुद मन्त्रालयले पूर्वाधार मूख्य शहरभन्दा बाहिर बनाउने गरी सम्झौताको तयारी गरेको छ । खेलकुदमन्त्री विराजभक्त श्रेष्ठले पूर्वाधार पोखरा अन्तर्राष्ट्रिय विमानस्थल वा गौतम बुद्ध अन्तराष्ट्रिय विमानस्थल नजिक हुनेगरी स्थान हेर्न निर्देशन दिएका छन् । कर्णाली र सुदूरपश्चिम प्रदेशमा पूर्वाधारमा लगानी गर्ने उनको चाहना छ ।
कतारले विश्वकप फुटबल २०२२ को एउटा रंगशाला पोट्रेबल रहेको र नेपाली श्रमिकको सम्मानमा रंगशाला नेपाललाई हस्तान्तरण गर्ने बताएको थियो । त्यसबारे पनि राजा थानीको भ्रमणका दौरानमा कुरा हुनेछ । सो रंगशाला कहाँ राख्ने भन्ने विषयमा पनि खेलकुद मन्त्रालयमा छलफल भएको छ ।