भारतको झारखण्डस्थित बोकारो जिल्लाको बन्दियोमा बस्ने राजीव कुमारले आफ्नी पत्नीको पुत्ला बनाएर दाहसंस्कार गरेका छन् । उनकी पत्नी परपुरुषसँग भागेपछि उनले यसो गरेका हुन् । पत्नी अहिले प्रेमीका साथ राँचीमा बसिरहेकी छन् ।
पत्नीको कामलाई विरोध गर्न राजीवले हिन्दू रीतिरिवाज अनुसार पत्नीको पुत्ला बनाएर अन्तिम संस्कार गरे । लामो समयसम्म बेपत्ता भएको वा हाडखोर समेत नभेटिने गरी दुर्घटनामा मरेको मानिसको कुशको पुत्ला बनाएर अन्तिम संस्कार गरिने प्रचलन छ । तर पत्नी अर्कोसँग भागेपछि आहत बनेका पतिले यस्तो उग्र कदम चालेका हुन् ।
उनले आफ्नो नाबालक पुत्रलाई आमाको प्रतीकात्मक पुत्लामा मुखाग्नि दिन लगाए । आफ्ना लागि पत्नीको मृत्यु भइसकेको राजीवको भनाइ छ । उससँग आफ्नो र आफ्नो परिवारको कुनै सम्बन्ध नरहेको उनले बताए ।