बलात्कार प्रयासको आरोप लागेका प्रदेशसभा सदस्य अक्कल रावललाई जिल्ला अदालत कैलालीबाट म्याद थप गरी प्रहरीले अनुसन्धान थालेको छ । रावल बिरुद्ध बलात्कार प्रयास गरेको उजुरी परेपछि बुधबार प्रहरीले उनलाई हिरासतमा राखेको थियो ।
बिहिबार कैलाली अदालतमा भएको बहसपछि उनलाई अनुसन्धानका लागी हिरासतमै राख्न अदालतले अनुमती दिएको हो । जिल्ला अदालत कैलालीका न्यायधिस कृष्ण प्रसाद नेपालको इजलासमा भएको बहसपछि उनलाई हिरासतमा राख्न अनुमती दिएको जिल्ला अदालत कैलालीका श्रेस्तेदार रैभान कुन्जेडाले बताए । २१ गतेदेखी लागु हुने गरी रावललाई ४ दिन हिरासतमै राखेर अनुसन्धान गर्न अदालतले अनुमती दिएको उनले बताए ।
नेपाल कम्युनिस्ट पार्टी (नेकपा) सुदूरपश्चिमका सचेतक समेत रहेका प्रदेशसभा सदस्य रावल एक महिलामाथि बलात्कारको दुस्प्रयास गरेको आरोपमा बुधवार पक्राउ परेका थिए । धनगढी उपमहानगरपालिका–४ उत्तरबेहडीकी एक बिबाहित महिलाले आफूमाथि बलात्कारको कोसिस गरेको आरोप लगाउदै जिल्ला प्रहरी कार्यालय कैलालीमा उजुरी दिएको एक सातापछि रावल पक्राउ परेका हुन् । प्रदेश सभाका सदस्य रावलका बिरुद्ध फागुन १४ गते प्रहरीमा उजुरी परेको थियो । जाहेरीमा ती महिलाले प्रदेश सभा सदस्य रावलले आफूमाथि माघ २१ गते जवर्जस्ती करणीको दुस्प्रयास गरेको आरोप लगाएकी छन् । जिल्ला प्रहरी कार्यालय कैलालीका प्रवक्ता दक्षकुमार बस्नेतले रावल पक्राउ गरेको स्वीकार गरे । रावल आफ्ना बिरुद्ध उजुरी परेपछि सोका बारेमा बुझ्न बुधवार आफै जिल्ला प्रहरी कार्यालय कैलाली पुगेको बताईएको छ । महिलाको उजुरीपछि पक्राउ पूर्जी जारी गरेको प्रहरीले रावललाई नियन्त्रणमा लिएर अनुसन्धान थालेको डिएसपी बस्नेतले बताए । जिल्ला प्रहरी कार्यालय कैलालीका प्रहरी नायव उपरिक्षक बस्नेतले रावलमाथि जवरजस्तीकरणी उद्योगमा मुद्धा दर्ता भएको बताए । उक्त मुद्धामा आरोप पुष्टि भए ५ बर्षसम्म कैद हुन सक्ने व्यवस्था रहेको उनले बताए । उक्त मुद्धामा साढे तीन बर्षदेखि ५ बर्षसम्म कैद सजायको व्यवस्था रहेको छ ।
रावल अछाम क्षेत्र नम्बर २ को ख बाट निर्वाचित नेकपाका सांसद हुन् । बलात्कार प्रयासको आरोप लगाउने महिलाले भान्जीको नाता लगाएर नेकपा सुदूरपश्चिमका सासंद रावलले दुस्प्रयास गरेको बताएकी छिन् । पीडित महिलाले माघ २१ गते कोठामै आएर रावलले जवरजस्तीकरणी गर्न खोजेको आरोप लगाएकी हुन् ।
यस अघी नेकपाबाट निर्वाचित सांसद तथा सुदूर पश्चिम प्रदेश सरकारका सामाजिक विकास मन्त्री दीर्घ सोडारी महिलासंगको अनैतिक सम्बन्धका कारण मन्त्रीबाट बर्खास्त गरिएका थिए ।