कञ्चनपुर : कञ्चनपुरको कृष्णपुर नगरपालिकाले कोरोना भाइरस (कोभिड १९) संक्रमण रोकथाम र नियन्त्रणका लागि एक करोड रुपैयाँको विपद् व्यवस्थापन कोष स्थापना गरेको छ। नगरपालिकाले कोरोना भाइरस रोकथाम र नियन्त्रणका लागि कोषको स्थापना गरिएको बताएको हो।
नगर प्रमुख कर्णबहादुर हमालले कोषको रकम कोरोना भाइरस रोकथाम तथा राहत प्याकेज वितरण र अन्य विपद् व्यवस्थापन गर्नका लागि खर्च गरिने बताए। दैनिक ज्यालादारी गरी जिवन निर्वाह गर्ने मजदुरहरुलाई परिवार संख्याका आधारमा चामल २५ किलो, दाल ३ किलो, नुन १ किलो, तेल १ लिटर र ४ जना भन्दामाथि संख्या भएको परिवारलाई चामल ३० किलो, दाल ३ किलो, नुन १ किलो, तेल १ लिटर वितरण गर्ने मापदण्ड निर्धारण गरेको छ।
कोरोना भाइरस पूर्वतयारी तथा प्रतिकार्यसम्बन्धी वडास्तरीय समन्वय समितिमार्फत राहत वितरण गरिने बताइएको छ।