कोरोना भाइरस (कोभिड १९) विरुद्ध लड्न चीनको स्वशासित क्षेत्र तिब्बत सरकारले नेपाललाई सवा ८ करोडभन्दा धेरैको स्वास्थ्य सामग्री दिएको छ ।
बुधबार नेपाल चीन व्यापारिक नाका तातोपानीमा चिनियाँ पक्षले स्वास्थ्य मन्त्रालयका वरिष्ठ विशेषज्ञ रोशन पोख्रेललाई उक्त सामग्री हस्तान्तरण गरेको तातोपानी भन्सार कार्यालयले जनाएको छ ।
प्राप्त सामग्रीमा १० हजार थान एन–९५ मास्क, १० हजार थान पीपीई, एक हजार थान इन्फ्रारेड थर्मोमिटर, पीसीआर मेसिन दुई थान, २० हजार थान टेस्टिङ किट र ५० थान वेट वाइप लगायत रहेको तातोपानी भन्सार प्रमुख लालबहादुर खत्रीले जानकारी दिए ।
चैत २८ गते तिब्बत सरकारको विदेश विभाग प्रमुखले नेपाली महावाणिज्यदूत गोविन्द कार्कीलाई उक्त स्वास्थ्य सामग्री ल्हासा हस्तान्तरण गरेकी थिइन् ।
काठमाडौंस्थित चिनियाँ दूतावासका प्रवक्ताले सार्वजनिक गरेको विज्ञप्तिअनुसार यो चरणमा नेपाल ल्याइएको स्वास्थ्य सामग्री अनुदानमा पठाइएको हो ।
चिनियाँ दूतावासको विज्ञप्तिमा कोरोना भाइरस ९कोभिड–१९० विरुद्ध लड्न नेपाललाई चीनको सद्भाव र सहयोग सधैं रहने उल्लेख छ । आगामी दिनमा सहकार्य र समन्वय बढाउँदै नेपाललाई सहयोग गर्ने चीनले प्रतिबद्धता व्यक्त गरेको छ ।