कोरोना भाइरसको महामारीले विश्व त्रसित छ । विश्वका शक्तिशाली मुलुक कोरोनाविरुद्ध संघर्षरत छन् । शक्तिशाली मुलुक अमेरिका, यूरोपियन मुलुक बेलायत, स्पेन, इटाली लगायतमा कोरोना संक्रमणको अवस्था निकै नाजूक भइरहेको अवस्थामा विश्वका तीन मुलुकले कोरोना विरुद्धको लडाइँ जितेर ग्रीन जोनमा पर्न सफल भएका छन् ।
कोरोना विरुद्धको औषधी पत्ता नलागिसकेको अवस्थमा यो सबैका लागि सुखद् समाचार पनि हो । कोरोनाविरुद्धको औषधिविना नै ती मुलुकका संक्रमित सबै बिरामीहरु निको भएर घर फर्किएका छन् ।
कोरोनाविरुद्धको लडाइँ जित्ने मुलुकहरुमा सेन्ट लुसिया, ग्रीन ल्याण्ड र सेन्ट बार्थ रहेका छन् ।
सेन्ट लुसियामा १५ जनामा कोरोनाको संक्रमण पुष्टि भएको थियो । उनीहरु सबै अस्पतालमा उपचारपछि निको भएर घर फर्किएका छन् । त्यसैगरी ग्रीनल्याण्डमा ११ जनामा कोरोनाको संक्रमण देखिएकोमा सबै उपचार पछि निको भएर घर फर्किएका छन् । अर्को सेन्ट बार्थमा ६ जनामा कोरोना देखिएकोमा सबै सफल उपचार भएको छ ।
कोरोना भाइरसको संक्रमणबाट सबैभन्दा बढी आक्रान्त अमेरिका छ । अमेरिकामा हालसम्म ४९ हजार ८४५ जनाले ज्यान गुमाइसकेका छन् भने ८ लाख ८० हजार बढी संक्रमित भएका छन् । ८५ हजार ९२२ जना उपचारपछि निको भएर घर फर्किएका छन् । ७ लाख ४४ हजार ४३७ जना उपचाररत रहेका छन् ।
विश्वमा शुक्रबार विहान समाचार तयार पार्दासम्म कोरोनाका कारण ज्यान गुमाउनेको संख्या १ लाख ९० हजार ६५४ पुगेको छ । २७ लाख १८ हजार ७ सय बढी संक्रमित छन् । विश्वमा ७ लाख ४५ हजार ६२० जना उपचारपछि निको भएर घर फर्किएका छन् ।