विदेशमा समस्यामा परेर नेपाल फर्किने नेपालीलाई नेपाल टेलिकमले निःशुल्क सीमकार्ड उपलब्ध गराउने भएको छ । सरकारले विदेशका रहेका नेपालीलाई स्वदेश ल्याउने तयारी गरेको छ। उनीहरूलाई हवाई मार्ग र देशभर विभिन्न २० वटा नाकाहरू तोकेर नेपाल भित्र्याउने तयारी गरिएको छ।
यसरी भारतबाट स्वदेश फर्कनका लागि तोकिएको विभिन्न २० वटा नाकाहरूबाट आएका नेपाली र त्रिभुवन अन्तर्राष्ट्रिय विमानस्थल हुँदै आउने नागरिकहरूलाई राख्ने क्वारेन्टाइन स्थल तथा होल्डिङ सेन्टरहरूमा बुथ स्थापना गरी नेपाल टेलिकमले निःशुल्क सीमकार्ड दिन लागिएको एक विज्ञप्ती मार्फत कम्पनिले जनाएको छ ।
यसरी सीमकार्ड प्राप्त गर्नका लागि नागरिकता, राहदानी, सवारी चालक अनुमतिपत्र, ट्राभल डकुमेन्ट वा परिचय झल्कने अन्य कागजातमध्ये कुनै एक उपलब्ध गराउनु पर्नेछ ।
विदेशबाट आउने उनीहरूसँग कुनै परिचयपत्र उपलब्ध नभएमा आफन्त तथा निकटका व्यक्तिको परिचय पत्रको आधारमा पनि सीम उपलब्ध गराउने कम्पनिले जनाएको छ ।
यस्तै त्रिभुवन अन्तर्राष्ट्रिय विमानस्थलबाट नेपाल प्रवेश गर्ने नेपालीका लागि सरकारले काठमाडौं उपत्यकामा व्यवस्था गरेको होल्डिङ सेन्टरहरूमा नेपाल टेलिकमले निःशुल्क वाइफाइ सेवा उपलब्ध गराउने तयारी नेपाल टेलिकमले गरेको छ।