विश्व स्वास्थ्य संगठन (डब्ल्यूएचओ) ले पछिल्ला दुई सातायता विश्वमा हरेक दिन १ लाखका दरले कोरोना संक्रमित थपिइरहेको बताएको छ।
जेनेभामा आयोजित नियमित प्रेस ब्रिफिङमा डब्ल्यूएचओका महानिर्देशक डा. अधानोम टेड्रोसले २ सातायता कोरोना संक्रमण झनझन् बढ्दै गएको बताएका हुन्।
‘हरेक दिन १ लाख नयाँ केस थपिएको रिपोर्टिङ हामीलाई प्राप्त भइरहेको छ, जसमा ७५ प्रतिशत हिस्सा १० देशको मात्रै छ,’ पत्रकार सम्मेलनमा उनले भने, ‘त्यसमा पनि विशेषगरी अमेरिका र दक्षिण एसियाका छन्।’
कोरोना नियन्त्रण भइसकेको चीनमा ५० दिनपछि बेइजिङमा गत हप्ता नयाँ क्लस्टर देखिएको बताउँदै उनले त्यसबारे अनुसन्धान भइरहेको जानकारी दिए। उनले भने, ‘यसको अर्थ कोरोना नियन्त्रण गर्न सक्ने क्षमता भएका देशमा पनि पुनःसंक्रमण हुने जोखिम उत्तिकै छ।’
डब्ल्यूएचओको पछिल्लो तथ्यांकअनुसार विश्वभर ७८ लाख भन्दा बढी मानिसलाई कोरोना संक्रमण पुष्टि भएको छ भने यसबाट ४ लाख ३० हजार जनाको मृत्यु भइसकेको छ।