चीन र भारतको सीमावर्ती क्षेत्र लद्दाखमा दुई देशका सेनाबीच भएको झडपमा ५ चिनियाँ सैनिक मारिएको भारतीय सञ्चार माध्यमले जनाएका छन् ।
साथै ११ जना चिनियाँ सैनिक घाईते भएका छन् । सोमवार राति भएको चीन र भारतको सीमावर्ती क्षेत्र पूर्वी लद्दाखस्थित गलवान घाँटीमा दुबै देशका सेनाको बीचमा हिंसात्मक झडप भएको हो । झडपका क्रममा चीनमा पाँच सैनिक तथा भारतीय सेनाका दुई जवान र एक अफिसरको मृत्यु भएको जनाइएको छ ।
सीमामा संकट बढ्दै गएको बेला भारतीय सेनाले आफ्नो बयानले हिंस्रक झडपमा दुबै पक्षको ठूलो क्षति भएको बताएको छ । ग्लोबल टाइम्सले झडपमा पाँच चिनियाँ सैनिक मरेको दाबी गरेको हो ।
केही समय यता लद्दाखमा भारत र चीनबीच सीमाका विषयमा विवाद हुँदै आएको थियो । दुबै पक्षले सीमा क्षेत्रमा सैनिक संख्या बढाएका थिए ।
भारतीय सञ्चार माध्यमहरुले दुवै देशका सैनिक अधिकारीबीच वार्तापछि चिनियाँ सैनिकले सैनिकको संख्या घटाएको जनाएका थिए।
भारतले चीनको सीमामा जारी तनाव कम गर्न प्रयास भैरहेको बताएको छ। आफ्नो तीन सैनिक अधिकारी मारिएको विषयमा जानकारी दिँदै भारतीय सेनाले दुवैतर्फ सैनिक फिर्ताको प्रक्रिया भइरहेको समयमा सो घटना भएको जनाएको छ।
‘गलवान उपत्यकामा तनाव कम गर्ने प्रक्रिया भइरहेको समयमा गत राति दुवै पक्षबीच आसने सामने हुँदा हताहती भएको हो’ भारतीय सेनाले विज्ञप्तिमा भनेको छ, ‘भारततर्फ एक अधिकृत र दुई जवानको ज्यान गएको छ। तनावपूर्ण परिस्थितिलाई कम गर्नका लागि दुवै सैनिकका वरिष्ठ अधिकारीहरुबीच बैठक भइरहेको छ।’
झडपको विषयलाई लिएर दुवै देशले आआफ्नै दाबी गरेका छन् । चिनियाँ पक्षले भारतीय सैनिकहरुले सोमबार दुई पटक सीमा रेखा पार गरेर चीनतर्फ आएका कारण झडप भएको जनाएको छ।
यसअघि सन् १९७५ दुई देशका सेनाबीच अरुणचलको तुलुङ लामा गोली चल्दा असम राइफल्सका चार जवानको ज्यान गएको थियो। त्यसछि सन् १९६२ मा भारत र चीनबीच एक महिने युद्ध भएको थियो।
लद्दाखमा गत एक महिनादेखि भारतीय र चिनियाँ सैनिकबीच तनाव जारी छ। जसको निकास खोज्न जुन ६ का दिन दुई देशका सैन्य अधिकारीबीच वार्ता भएको थियो। त्यसयता लगातार थुप्रै चरणका वार्ता भए पनि तनाव भने कम भएको थिएन।
पछिल्लो समय लद्दाखमा दुवै पक्षले भौतिक संरचना निर्माणको गति र सेना तथा हतियारको संख्या वृद्धि गरिरहेका छन्।