कञ्चनपुर : भीमदत्त नगरपालिका र प्रधानमन्त्री कृषि आधुनिकीकरण परियोजनाको कार्यान्वयन एकाइ धानक्षेत्रबीच नगरपालिका क्षेत्रमा साझेदारी कार्यक्रम सञ्चालनका लागि शुक्रवार सम्झौता गरिएको छ ।
नगरपालिकाका निमित्त प्रमुख प्रशासकीय अधिकृत नरेन्द्रसिंह ठगुन्ना र परियोजना कार्यान्वयन एकाइका वरिष्ठ कृषि विकास अधिकृत टीकाराम थापाले सम्झौता पत्रमा हस्ताक्षर गर्नुभएको छ ।
चालू आर्थिक वर्षका लागि नगरपालिकाका वडा नं १, २, ३, १८ र १९ मा सञ्चालन गरिने कार्यक्रमअन्तर्गत साना सिँचाइ, कृषि यान्त्रीकरण, माटो परीक्षण, उन्नत जातको धान र मुङको बीउ वितरण तथा किसानको क्षमता अभिवृद्धि तालीम सञ्चालन गर्ने कार्यक्रम समावेश गरिएका छन् ।
कृषि उद्यमी, कृषक समूह र कृषि सहकारीले परियोजनामा पेश गरेका प्रस्तावबाट छनोट गरी कार्यक्रम सञ्चालन गरिने नगरपालिकाका सूचना अधिकारी हरिसिंह धामीले बताउनुभयो । सो परियोजना भीमदत्त र कृष्णपुर नगरपालिकाका कृषि उत्पादन क्षेत्रमा सञ्चालन गरिएको छ ।