भारतमा कोरोना संक्रमितको संख्या दैनिक बढ्दै गएको छ। गत २४ घण्टामा १३ हजार ५ सय ८६ जना संक्रमित थपिएका छन्। यो सँगै भारतमा संक्रमितको संख्या ३ लाख ८० हजार ५ सय ३२ पुगेको छ। सोही अवधिमा ३ सय ३६ जना संक्रमितको मृत्यु भएको छ।
एकैदिन यति धेरै संख्यामा संक्रमित भेटिएको यो पहिलो पटक हो। यसअघि बिहिबार एकै दिन १२ हजार ८ सय ८१ संक्रमित भेटिएका थिए। कुल संक्रमितमध्ये १ लाख ६३ हजार २ सय ४८ जना संक्रिय संक्रमित हुन्। हालसम्म २ लाख ४ हजार ७ सय ११ जना उपचारपछि डिस्चार्ज भएको भारत सरकारले जनाएको छ। मृतकको संख्या १२ हजार ५ सय ७३ पुगेको छ।
सबैभन्दा धेरै संक्रमित भेटिएको महाराष्ट्रमा गत २४ घण्टामा ३ हजार ७ सय ५२ संक्रमित थपिएका छन्। यो सँगै महाराष्ट्रमा संक्रमितको संख्या १ लाख २० हजार ५ सय ४ पुगेको छ भने ५ हजार ७ सय ५१ जनाको मृत्यु भएको छ। हालसम्म ६० हजार ८ सय ३८ जना उपचारपछि निको भएका छन्।
तमिल नाडुमा ५२ हजार ३ सय ३४ संक्रमित छन् भने ६ सय २५ जनाको मृत्यु भएको छ। २८ हजार ६ सय ४१ जना निको भएका छन्। डेल्लीमा संक्रमितको संख्या ४९ हजार ९ सय ७९ पुगेको छ। हालसम्म १ हजार ९ सय ६९ जनाको मृत्यु भएको छ भने २१ हजार ३ सय ४१ जना उपचारपछि निको भएका छन्। यो सहित भारतको १८ राज्यमा कोरोना संक्रमित भएका छन्।