जनता समाजवादी पार्टी (जसपा) ले दल दर्ताको आधिकारिकता पाएको छ। निर्वाचन आयोगले आइतबार सो दललाई जनता समाजवादी पार्टी बनेको आधिकारिकता दिएको हो।
राष्ट्रिय जनता पार्टी नेपाल (राजपा) र समाजवादी पार्टीले एकीकरण गरेर जनता समाजवादी पार्टी घोषणा गरेका थिए। सरकारले वैशाख ८ गते दल विभाजन गर्न मिल्ने गरी अध्यादेश ल्याएपछि महन्थ ठाकुरको संयोजकत्वमा रहेको राजपा र उपेन्द्र यादव नेतृत्वको समाजवादी पार्टीले त्यसलगत्तै दुई पार्टी एकताको घोषणा गरेका थिए।
निर्वाचन आयोगकी सचिव देव कुमारी गुरागाईले दुवै दल एक भएपछि बनेको जसपालाई निर्वाचन चिह्न र झण्डा असार २४ गते दिइएको जानकारी दिइन्।
एकतापछि जसपाका दुई अध्यक्ष ठाकुर र यादवले संयुक्त रुपमा विज्ञप्ति प्रकाशित गरी दल दर्ता प्रमाणपत्र र आधिकारिक पत्र प्राप्त गरेको जनाएका छन्।
एकतापछि दलको कार्यालय बालकुमारी ललितपुरमा रहनेछ। जसपामा ३३ सांसद छन्।