कलाकार दीपाश्री निरौलाले महानायक राजेश हमालसँग पुनः माफी मागेकी छिन् । आइतबार परेको जन्मदिनको अवसरमा फेसबुकमार्फत लाइभ आउँदै दीपाश्रीले मिडियामा प्रस्तुत हुने तरिका नपुगेको भन्दै माफी मागेकी छिन् ।
उनले अन्तर्वार्तामा जाँदा आफूले तीन वटा गल्ती गरेको बताएकी छन् । उनले यसअघि पनि राजेदश हमालसँग माफी मागेकी थिइन् ।
‘मिडियामा कसरी फेस हुने, शिष्ट सरल हुने, चलाखीपूर्ण तरिकाले कसरी उत्तर दिने भन्नेमा मेरो कमजोरी रहेछ । मैले अहिले महसुस गरे’, उनले भनेकी छिन् , ‘सहकर्मी दिपकराज गिरीले नजानु भन्दा वेवास्ता गरेर विना तयारी अन्तर्वार्तामा जानु पहिलो गल्ती थियो ।
दोस्रो गल्ती मलाई आरोप लाग्ने घोचिला पेचिला प्रश्नहरुले गर्दा आफूलाई, आफ्नो आवेशलाई नियन्त्रण गर्न सकिन । बडि ल्याङग्वेजमा समस्या आयो । तेस्रो गल्ती र प्रमुख गल्ती भनेको मिडियामा कुटनीतिक चलाखी देखाउन सकिन । म एउटा कलाकार भएर अर्को एउटा सिनियर कलाकारको बारेमा टिप्पणी गर्न पुगें । त्यो मेरो ठूलो भुल महसुस भयो ।’
उनले सम्पूर्ण नेपालीहरुसँग उक्त शब्द चयनबारे माफी माग्दै आगामी दिनमा राम्रो चलचित्र बनाउने बताएकी छन् ।
‘अबदेखि यस्तो गल्ती दोहोर्याउँदिन । आफ्नो व्यक्तित्व विकासमा समय खर्चिन्छु । दर्शको लागि राम्रो फिल्म बनाउने कोसिस गर्छु’, उनले रुँदै भनिन्,‘ राजेश दाईका फ्यानहरुलाई के भन्न चाहन्छु भने मेरो अभिव्यक्तिले यहाँहरुको मन दुखेको छ भने प्लिज आफ्नै दिदीबहिनी सम्झेर मलाई माफी दिनुहोला ।’