तिमी हौ फूल डालीको, तिमी नै हौ सुवासना।
तिमी भक्ती तिमी पूजा, तिमी नै हौ उपासना।।
म पूजा गर्दछुँ प्रिया, किन त्यो मन्दिर धाउनु
तिमी कैलाश झै मेरो, तिमी मेरी मनकामना।
तिमी हौ घरकी लक्ष्मी, तिमी नै हौ सरस्वती
म तिम्रै गरुँला पूजा, तिम्रो नै स्तुति वन्दना।
गुलाफी ओठमा हेरुँ, कि हेरूँ चक्षु चञ्चल,
र आँखा बन्द झै राखी,गरुँ म काव्य सिर्जना।
म तिम्रै गीत गाऊँ झै, बसूँ झै म समीपमा,
छातीमा बिम्ब टासेर, भरूँ म कापिका पना।