दिनभरि ढाेल्या भाणाे नउठउन्या ।
बासा घर अउन्या खाना निकाे नाइ भयाे भुणिवरि रङलाे मचाैने चेला चेलिन कि पछ्याण ।
बाबाले ननतिना हकारे वटि क्याइ हारुन्छाै ।
भुणीवटि रिसाने लाडलि इजा कि पछ्याण ।।
संगै वसिवटि रक्सी खाने संगै जुवातास खेल्या ।
बासा घरमुण हुल्लीकला गद्या बुवाचेला कि पछ्याण ।।
बिदेशहै पाेइले दियापैसाले चम्मनउडाइ राख्दे ।
पाेइले घरअाैनज्या अर्का पाेइल झाने स्वानि कि पछ्याण ।।
दगाैने ब्वारि खालिलै टुन टुन गर्दे सासू ।
नानि कुरडि कि ठुली वनाइवटि झकडा गद्दे सासुब्वारि कि पछ्याण ।।
सस्ताे समान निकाे भुणिवटि अकराे माेल गर्दे ।
ग्राहकाैन ठगि राख्दे दुकानदार कि पछ्याण ।।
स्कुलमाइ क्लासमाइ नबस्या विचैमाइभाग्दे।
झेडिन लुकिवटि विडितमाख भाङधदुराे खाने ।
स्कुलमाइ गुरु घर इजाबुवा भुण्या नमान्ने स्कुले कि पछ्याण ।।
क्लासमाइ नपढाैने नेतानका पछाडि लागिरने।
अाफ्नि पढाएकि बिध्यार्थिसित ब्या गर्दे शिक्षककि पछ्याण ।।
अाफु खेतिपाति निक्केरि नगर्दे ।
अर्का निकी खेति भ्या रिसमाण्डे किसान कि पछ्याण ।।
पैसा दिन्यानकाे काम झट्ट नदिन्यान झुलाई राख्दे ।
कार्यालय माइ काम गर्ने कर्मचारिन कि पछ्याण ।।
पडाैसि हु भुणने व्यवहार निकाे नगर्दे पडाैसि ।
समाज सेविहु भुणे समाजलाई ठग्दे समाजसेवि कि पछ्याण ।।
भाेट मागुन्ज्या निका निका भाषणमाइ जन्तान फकाैने ।
जितिसके पछा टेरपुच्छर नराख्दे नेतान कि पछ्याण ।।
विमार त विमार इसाे विमार दवाइ नपाइने ।
विमारिकाे सयार गर्दाकि नजिकै नझानु पड्य ।
मरिग्या खड्डेउन पड्य एइ काेरना कि इसि पछ्याण ।।
पछयाण त पछ्याण इसि पछ्याण भ्यावटि के हम नयाँ नेपाल बनाइ सक्ला त ? कसाेप कसाेप मुइत पत्यार नाइमाण्डाे ।
- प्रताप सिंह साउद (तिल्केनी - १० भीमदत्त नगर )