असोज२४,कंचनपुर। भिमदत्त नगरपालिकाले खरिद गरेको पिसिआर मेसिन दुई महिना बित्नै लाग्दा पनि सञ्चालनमा आउन सकेको छैन।
कोरोना(कोभिड-१९) रोकथाम तथा निर्देशक समन्वय समितीको निर्णय बमोजिम भिमदत्त नगरपालिकाले खरिद गरेको मेसिन दुई महिना बित्नै लाग्दा पनि सञ्चालनमा नआई प्रयोगविहिन हुँदा थन्किएको छ । झण्डै दुई महिना अगाडि २८ साउनमा भीमदत्त नगरपालिकाले ३८ लाखमा पीसीआर मेसिन खरिद गरेको थियो ।
भीमदत्त नगरपालिकाले आव्हान गरेको सार्वजनिक सूचना अनुसार सुदिप इन्टरनेशनले ३८ लाख रुपैयाँमा मेसिन खरिद गरी नगरपालिकालाई उपलब्ध गराएको थियो । पीसीआर मेसिन खरिद गरि नगरपालिकाले सञ्चालनको जिम्मेवारी महाकाली अस्पताललाई दिएको थियो ।
भिमदत्त नगरपालिका का नगर प्रवक्ता हिमाल चन्दका अनुसार नगरपालिकाले मेसिन खरिद गरिदिने र आवस्यक जनशक्ति र अन्य व्यवस्थापन गर्ने काम अस्पतालले गर्ने निर्णय भएको बताए । उनले भने " समुदायमा कोरोना गई सकेको छ तर सुदुरपश्चिम प्रदेश सरकारको ध्यान धनगढीमै केन्द्रित छ ।" कि त प्रदेश सरकारले महाकाली अस्पतालको स्वामित्व छोडि भिमदत्तको अस्पताल बनाए नगरपालिकाले अस्पतालको सबै व्यवस्थापन गर्ने, हैन भने प्रदेश सरकारले व्यवस्थापन गर्नु पर्ने नगर प्रवक्ता चन्दले बताए ।
प्रदेश सरकारको लापरबाहीका कारण पिसिआर मेसिन सुचारु हुन नसकेको बुझिएको छ । प्रदेश सरकारले आवश्यक पर्ने सामग्री उपलब्ध गराउन नसक्नु र अस्पताल सङ्ग कोर्डनेसन नगरेका कारण पिसिआर मेसिन
सञ्चालनमा ढिलाई भईरहेको समेत प्रवक्ता चन्दले बताए ।
पिसिआर मेसिनका लागि आवस्यक पर्ने अन्य मेसिनहरु न आउदा सञ्चालनमा ढिलाई भएको र अन्य आवस्यक मेसिनहरुको खरिदका लागि टेन्डर समेत भईसकेको अस्पतालका मेडिकल सुपरिटेन्डेन्ट डा. हरि कुमार श्रेष्ठले बताए। जनशक्ति कम भएको र भएका जनशक्ति लाई पनि कोरोना संक्रमण भईरहेकाले जनशक्तिको अभाव पनि देखिएको उनको भनाई छ । मेडिकल सुपरिटेन्डेन्ट डा.श्रेष्ठका अनुसार पिसिआर मेसिन सञ्चालनमा आउन अझै एक महिना लाग्ने भएको छ ।
तर मेसिन खरिदको दुई महिना बित्दै लाग्दा पनि अझै मेसिन जडान हुन नसक्दा कोरोना चेकजाँच गर्न धनगढि नै पुग्नु पर्ने अवस्था रहेको स्थानीयहरु बताउछ्न । महेन्द्रनगर मै पिसिआर मेसिन सञ्चालनमा आए कंचनपुरबासिले कोरोना रिपोर्टका लागि लागि कुर्नु पर्ने अवस्था नहुने र कोरोना परिक्षणको दायरा बढ्ने समेत स्थानीयको भनाई रहेको छ ।