काठमाडौँ। गृहमन्त्री रामबहादुर थापाले कोरोना भाइरस महामारीका कारण उत्पन्न आर्थिक तथा सामाजिक असरका कारण आसन्न चाडपर्वमा अपराधका घटना बढ्न सक्ने भन्दै प्रभावकारी सुरक्षा रणनीति बनाउन निर्देशन दिनुभएको छ । प्रदेश–१ अन्तर्गत प्रदेश स्तरीय सुरक्षा गोष्ठीलाई मङ्गलबार भर्चुअल प्रविधिबाट सम्बोधन गर्दै उहाँले समाजमा नयाँ शैलीमा अपराधका घटना बढ्न थालेकाले त्यसलाई रोक्ने गरी सुरक्षा योजना र आवश्यक रणनीति बनाउनुपर्नेमा जोड दिनुभएको छ ।
‘कोभिड–१९ महामारीका कारण अपराध नियन्त्रणमा नयाँ चुनौती थपिएका छन्’ उहाँले भन्नुभयो, ‘‘जनताको जिउधनको सुरक्षा गर्न अहिलेको सुरक्षा रणनीतिले पुग्दैन, यसलाई परिमार्जन गरी उच्च स्तरको सुरक्षा योजना र रणनीति बनाउन जरुरी छ ।’’
पछिल्लो समय लैङ्गिक हिंसा, महिला तथा बालबालिकामाथि करणी र बलात्कारका घटना अपत्यारिलो ढङ्गले बढेको उल्लेख गर्दै उहाँले यस्ता घटना हुन नदिन पूर्वतयारीका साथै राज्यका सुरक्षा निकाय चनाखो र संवेदनशील हुनुपर्नेमा
जोड दिनुभएको गृहमन्त्रीको सचिवालयले
जनाएको छ ।