रानी मुखर्जीसँग मेहेन्दी नामको फिल्ममा देखिएका नायक फराज खान यतिबेला बिरामी छन् । उपचारका लागि रकम नभएकोले फराज खानको परिवारले आर्थिक सहायताको गुहार लगाएको छ । यस्तोमा नायकको मद्दतका लागि एकपटक पुनः बलिउडका दबंग स्टार सलमान खान अघि सरेका छन् । उनले फराजको मेडिकल बिलको भुक्तानी गरिदिएका छन् ।
सलमानको यो मद्दतको जानकारी नायिका कश्मिरा शाहले दिएकी हुन् । सलमान खानसँग दुल्हनिया हम ले जाएंगे र कहीं प्यार ना हो जाए जस्ता फिल्ममा काम गरिसकेकी कश्मिराले यो कुराको जानकारी आफ्नो इन्स्टाग्राममार्फत् दिएकी हुन् । उनले सलमान खानको एउटा फोटो साझा गर्दै लेखिन्, ‘तपाईं साँच्चै नै एक असल व्यक्ति हुनुहुन्छ । फराज र उनको मेडिकल बिलको केयर गर्नुभएकोमा धन्यवाद । फरेब गेमका नायक फराज खानको स्थिती नावुक छ र सलमान खान उनको मद्दतमा उत्रिएका छन् । उनले यसरी अन्य थुप्रैको मद्दत गरेका छन् । म एक साँचो प्रशंसक हुँ र सधैं रहनेछु । यदि मानिसहरुलाई मन पर्दैन भने मलाई केही फरक पर्दैन । तपाईंसँग मलाई अनफलो गर्ने सुविधा छ । मलाई लाग्छ कि उनी साँचो मानिस हुँ जसलाई मैले इन्डष्ट्रिमा भेटेको छु ।’
स्मरण रहोस्, बुधबार मात्रै पूजा भट्टले ट्वीट गरेर फराज खानको स्थितीबारे सबैलाई अवगत गराएकी थिइन् । पूजाले मानिसहरुसँग सहयोगको अपिल पनि गरेकी थिइन् । फराज खान पछिल्लो पाँच दिनेदेखि बेंगलुरुको अस्पतालको भेन्टिलेटरमा उपचार गराइरहेका छन् । उनलाई स्नायू सम्बन्धि समस्या छ । फराज खानका भाइ फरहान खानले आफ्नो दाइको उपचारका लागि २५ लाख भारु आवश्यकता भएको बताएका थिए ।