राष्ट्रिय परीक्षा बोर्डले विद्यालयको अनुकुलतामा परीक्षा सञ्चालन गर्न भनेपछि बैतडीमा पनि कक्षा ११ को परीक्षा शुरु भएको छ । जिल्लाका विभिन्न विद्यालयहरुमा आन्तरिक मूल्यांकनका आधारमा कक्षा ११ को परीक्षा सञ्चालन गर्ने राष्ट्रिय परीक्षा बोर्डको निर्णयपछि विद्यालयहरुले परीक्षा सञ्चालन गर्न थालेका हुन् ।
कोरोना भाईरसको जोखिमबाट बच्नका लागि स्वास्थ्य सुरक्षा सतर्कताका मापदण्ड अपनाएर परीक्षा शुरु गरिएको सेटीगाउँ मावि ककरपाखाका प्रधानाध्यापक परमानन्द जोशीले जानकारी दिनुभयो । सामाजिक दुरी कायम गर्दै स्वास्थ्य सुरक्षा सतर्कताका मापदण्ड अपनाएर परीक्षा शुरु गरिएको उहाँले बताउनुभयो ।
बैतडीमा ५९ विद्यालयका विद्यार्थीहरु परीक्षा दिने तयारीमा छन् । केही विद्यालयमा परीक्षा शुरु भईसकेको जानकारी आएको छ भने केही विद्यालयहरु परीक्षाको तयारीमा रहेको जानकारी आएको शिक्षा विकास तथा समन्वय इकाइका प्राविधिक सहायक रामचन्द्र भट्टले जानकारी दिनुभयो ।
राष्ट्रिय परीक्षा बोर्डले मंसीर १२ गतेभित्र सबै विद्यालयहरुलाई कक्षा ११ परीक्षा गरिसक्न निर्देशन दिएको छ । बैतडीमा ३ हजार ६५५ जना कक्षा ११ का परीक्षार्थी रहेका शिक्षा विकास तथा समन्वय इकाइले जनाएको छ ।