काठमाडौं। काठमाडौंको कलंकीमा बिहीबार बिहानै दुर्घटना हुँदा तीन जनाको मृत्यु भएको छ। रोकिराखेको ट्रकमा मिनिट्रक ठोक्किँदा नुवाकोटका तीन जनाको मृत्यु भएको हो।
कलंकी चोकबाट कुखुरा बोकेर स्वयम्भू जाँदै गरेको बा ५ ख ८८६५ नम्बरको मिनिट्रक मकालु पेट्रोल पम्प नजिकै रोकिराखेको बा ३ ख ७५३० नम्बरको ट्रकमा ठोक्किएको हो। दुर्घटनामा कुखुरा बोकेको मिनिट्रकमा सवार तीन जनाको मृत्यु भएको प्रहरीले जनाएको छ।
दुर्घटनामा नुवाकोटको सुन्दरदेवी गाउँपालिकाका २४ वर्षीय रोशन तामाङ, तार्केश्वर गाउँपालिका- ५ का ३७ वर्षीय माधवप्रसाद घिमिरे र सोही ठाउँका २७ वर्षीय भूपेन्द्र तामाङको मृत्यु भएको हो।
दुर्घटनाको कारण भने खुल्न बाँकी रहेको प्रहरीले जनाएको छ। तीब्र गतिका कारण दुर्घटना भएको प्रहरीको प्रारम्भिक अनुमान छ।