अमेरिकाका नवनिर्वाचित राष्ट्रपति जो बाइडेनले आफ्नो नयाँ सरकारलाई निवर्तमान राष्ट्रपति डोनाल्ड ट्रम्पले रोक्न खोजे मानिसहरुको मृत्यु हुन सक्ने चेतावनी दिएका छन्।
डेलावेयरमा आयोजित एक कार्यक्रममा बाइडेनले भने, ‘कोरोना महामारीलाई रोक्न सामञ्जस्य जरुरी छ। ट्रम्पले नयाँ बन्ने सरकारलाई अवरोध जारी राखे भने थप धेरै मानिसको मृत्यु हुन सक्छ।’
ट्रम्पले हार स्वीकार नगर्नु लज्जाजनक भएको बाइडेनले टिप्पणी गरेका छन्।
३ नोभेम्बरमा भएको निर्वाचनमा जो बाइडेन ३०६ इलेक्टोरल कलेजमा विजयी भएर राष्ट्रपतिमा निर्वाचित भएका थिए। जितका लागि २७० इलेक्टोरल कलेज पर्याप्त हुन्छ।
यसका बाबजुद ट्रम्पले सोमबार ‘चुनाव मैले जितेको हुँ’ भन्दै ट्विट गरेका थिए। ट्विटरले उनलाई चेतावनी दिँदै उक्त सूचनाको बारेमा अर्को स्रोतले फरक कुरा भनेको बताएको छ। –बीबीसी