नवनिर्वाचित अमेरिकी राष्ट्रपति जो बाइडेनले आफूले पद सम्हालेको पहिलो एक सय दिनमा १० करोडलाई खोप दिइसक्ने लक्ष्य राखेको बताएका छन् ।
बाइडेनले आफ्नो कार्यकालका सुरुवाती महिनामा महामारी अन्त्य गर्न सम्भव नभए पनि त्यस अवधिमा कोभिड–१९ को बाटो भने परिवर्तन गर्ने बताए । यद्यपि उनले आफ्नो कार्यकालमा चालिने रणनीतिबारे भने प्रस्ट रूपमा केही बताएका बताएका छैनन् ।
बाइडेनले जनवरी २० मा आफ्नो कार्यकाल सुरु गर्दै छन् । आफ्नो स्वास्थ्य कार्यदललाई परिचय गराउँदै बाइडेनले अमेरिकीलाई सय दिनसम्म मास्क लगाउन आग्रह गरेका बीबीसले उल्लेख गरेको छ । अमेरिकी नियामकले फाइजर र बायोएनटेकले विकसित गरेको खोप ९५ प्रतिशतसम्म प्रभावकारी रहेको पुष्टि गरेको छ ।
त्यसले अब उक्त खोप आपत्कालीन प्रयोगका लागि स्वीकृति दिन सकिने बाटो खोलेको छ । खाद्य तथा औषधि प्रशासन (एफडीए) ले सुरक्षाका कारण फाइजर र बायोएनटेकको खोपलाई स्वीकृति दिन रोक्नुपर्ने कुनै कारण नभेटिएको जनाएको हो । यूकेमा गतसाता स्वीकृति दिएर धेरै जनामा लगाउन सुरु गरिसकिएको यो खोपबारे अमेरिकाले पहिलोपटक यो तहमा बोलेको हो । औपचारिक निर्णयका लागि एफडीएले बिहीबार एउटा बैठक आह्वान गरेको जनाइएको छ ।
एफडीएको एउटा प्रकाशनमा उक्त खोप परीक्षणका विवरण भरपर्दो रहेका उल्लेख गरिएको छ ।
अमेरिका र यूके दुवै देशलाई उत्पादकहरूले खोपको सुरक्षा र प्रभावकारिताबारेको विशिष्ट तहका जानकारी उपलब्ध गराइएका थिए ।
अमेरिकाका वरिष्ठ संक्रामक रोगविज्ञ डा. एन्थोनी फाउचीले यूकेको खोप स्वीकृति दिने प्रक्रियाको आलोचना गरेको देखिएको भन्ने आफ्नो भनाइका लागि माफी मागेका थिए । एफडीएले प्रकाशित गरेको विस्तृत विवरणमा उसले उत्पादक कम्पनी फाइजरले भनेझै ९५ प्रतिशत प्रभावकारी रहेको जनाएको हो । तर पूर्ण सुरक्षाका लागि दुईवटै डोज आवश्यक पर्ने एफडीएले जनाएको छ ।
पहिलो डोजले निकै गम्भीर घटनामा ८९ प्रतिशत सुरक्षा दिने उसको भनाइ छ । खोपले कोभिड संक्रमित भइसकेकालाई पनि उस्तै सुरक्षा दिने बताइएको छ । एफडीएका अनुसार यो खोप लिने व्यक्तिहरूमा दुखाइको समस्या हुने, खोप लगाइएको स्थानमा रातो डाम हुने तथा सुन्निने समस्याहरू देखिन सक्छ । त्यसका साथै खोप लिएपछि छोटो समयका लागि थकान, टाउको दुख्ने र मांसपेसी दुख्ने समस्यासमेत देखिन सक्ने जनाइएको छ ।
गर्भवती महिला र १६ वर्षमुनिका बालबालिकामा यसको परीक्षण नगरिएकाले त्यो उमेर समूहमा त्यसले अझै स्वीकृति पाउने काम बाँकी रहेको जनाइएको छ ।
राष्ट्रपति ट्रम्पले अमेरिकामा निर्मित खोपमा अमेरिकी नागरिकलाई पहिलो प्राथमिकता दिइने काम सुनिश्चित गर्न एक कार्यकारी आदेशमा हस्ताक्षर गरेका छन् । अन्य देशमा खोप पठाउने सम्झौता गरिसकेका उत्पादकहरूका हकमा उक्त आदेश पनि के हुन्छ भन्नेबारे भने प्रस्ट छैन । -कान्तिपुर दैनिकमा खबर छ ।