गोलभेंडाको मूल्य घट्दा कृषक दु:खी

गोलभेंडाको मूल्य घट्दा कृषक दु:खी

सर्लाही । भान्सामा नभइ नहुने तरकारी गोलभेंडाको शहर भनेर चिनिने सर्लाहीका कृषक एक सातामै यसको मूल्य आधाले घटेपछि मारमा परेका छन् ।

उत्पादनको मध्ययाममा गोलभेंडाको मूल्य ह्वात्तै घटेको हो ।

एक साता अघिसम्म यहाँका किसानले गोलभेंडा प्रतिक्रेट एक हजारभन्दा बढीमा बिक्री गरेका थिए ।

शनिवार किसानले गोलभेंडा एक क्रेटको ४५० देखि पाँच सय रुपियाँमा बिक्री गरिरहेका छन् ।

यसरी निरन्तर मूल्य ओरालो लाग्दा गोलभेंडाको उत्पादन लागत नै नउठ्ने अवस्था आएको किसानको गुनासो छ ।

गोलभेंडाको मूल्य ह्वात्तै घट्दा ठूलो मार परेको लालबन्दी नगरपालिका–१०, चन्द्रपुरका किसान उदय पाख्रिनले गुनासो गर्नुभयो ।

‘पाँच बिघामा लगाएको गोलभेंडामध्ये भर्खर ३०९३५ हजार रुपियाँको बेचेको छ तर बजारमा मूल्य आधाभन्दा बढीले घटिसक्यो’, पाख्रिनले निराश हुँदै भन्नुभयो–‘यसैगरी दिनहुँ मूल्य घट्यो भने उत्पादन लागत समेत उठ्ने अवस्था छैन् ।’

थोरै उत्पादन हुँदा किसानले गोलभेंडाको राम्रो मूल्य पाएपनि अहिले अत्यधिक उत्पादन हुन थालेपछि मूल्य घटेको हो ।

उत्पादन बढिरहेकाले गोलभेंडाको मूल्य अझै ओरालो लाग्ने अवस्था रहेको किसानहरुले बताएका छन् ।

सुरुमा थोरै उत्पादन हुँदा र खेती सक्किने बेला राम्रो मूल्य पाएपनि यो समयमा बर्सेनि गोलभेंडाको मूल्य घट्ने गरेको हरिवन नगरपालिका–२, अत्रौलीका किसान बाबुलाल दोङले बताउनुभयो ।

‘बजारमा धेरै भित्रिएको बहानामा व्यापारीले हरेक वर्ष यो समयमा गोलभेंडाको मूल्य घटाउँदा किसान मारमा पर्ने गरेका छन्’, उहाँले भन्नुभयो ।

लालबन्दी बजारका थोक व्यापारी राकेश ढुङ्गेलले किसानले उत्पादन गरेको अनुसार बाहिर निकासी नहुँदा गोलभेंडाको मूल्य घटेको बताउनुभयो ।

‘यो समय गोलभेंडा अत्यधिक फल्ने समय हो तर माघे संक्रान्तिले गर्दा गोलभेंडा भन्दा पनि काठमाडौंका बजारमा तरुलको माग धेरै छ, ढुङ्गेलले भन्नुभयो–‘संक्रान्तिसम्म अब गोलभेंडाको मूल्य कम नै हुन्छ ।’

बजारमा भारतीय गोलभेंडा समेत प्रशस्त भित्रिएकाले यहाँ उत्पादन भएको गोलभेंडाको मूल्य घटेको व्यापारीहरुले बताएका छन् ।

सर्लाहीको लालबन्दी र हरिवन नगरपालिकाको उत्तरी भेगका किसानले व्यावसायिक रुपमा उत्पादन गर्ने गोलभेंडा लालबन्दी बजारमा ल्याएर बेच्ने गरेका छन् ।

यहाँको गोलभेंडा काठमाडौं, पोखरा, बुटवल लगायत देशका ठूला शहरहरुमा निर्यात हुने गरेको छ ।

लालबन्दी तरकारी बजार व्यवस्थापन समितिका अनुसार अहिले लालबन्दी बजारबाट दैनिक साँढे तीनसयदेखि चार सय क्विन्टल गोलभेंडा बाहिर निकासी भइरहेको छ ।

यहाँ मङ्सिरदेखि फागुनसम्म गोलभेंडा उत्पादन हुने गरेको गोरखापत्रमा प्रकाशित समाचारमा उल्लेख छ ।