विद्यालय तहको पाठ्यक्रम सम्बन्धी मुद्दा सर्वोच्च अदालतले हेर्दाहेर्दैमा राखेको छ। सोमबार न्यायधीश तेजबहादुर केसी र प्रकाशकुमार ढुंगानाको इजलासमा पाठ्यक्रम सम्बन्धी मुद्दा पेश भएको थियो।
सर्वोच्चका सूचना अधिकारी देवेन्द्र ढकालका अनुसार बहस नसकिएका कारण मुद्दालाई हेर्दाहेर्दैमा राखिएको हो। आज (मंगलबार) पनि यो मुद्दा सुनुवाईको लागि इजलासमा पेश गर्ने तयारी छ।
चालू शैक्षिक सत्रमा कक्षा १ र ११ मा लागू भइसकेको पाठ्यक्रम कार्यान्वयन नगर्न माग गर्दै २८ असोजमा सर्वोच्च अदालतमा मुद्दा परेको थियो। सर्वोच्चले कात्तिक १९ गते ‘पाठ्यक्रम प्रारूप कार्यान्वयन नगर्नु, यथास्थितिमा राख्नु’ भनि अन्तरिम आदेश दिएको थियो।
आधाभन्दा बढी शैक्षिक सत्र सकिँदा पनि नयाँ कि पुरानो पाठ्यक्रम अनुसार पठनपाठन गर्ने भन्नेमा शिक्षक र विद्यार्थी अन्योलमा पर्दै आएका छन्।