प्रतिनिधिसभा विघटनविरुद्धका मुद्दामा दोस्रो दिनको सुनुवाइ सकिएको छ । उक्त मुद्दाको निरन्तर सुनुवाई मंगलबार पनि जारी रहने प्रधानन्यायाधीश चोलेन्द्र शमशेर जबराले बताए ।
सोमबारको सुनुवाइमा निवेदकका तर्फबाट दुई कानुन व्यवसायीले मात्रै सहभागिता जनाएका थिए । सोमबारको संवैधानिक इजलासको बहसमा दिनमणि पोखरेल र सरोजकृष्ण घिमिरेले मात्रै सहभागिता जनाएका हुन् ।
आइतबारको सुनुवाइमा चार जना कानुन व्यवसायीहरूले सहभागिता जनाएका थिए । न्यायाधीश अनिलकुमार सिन्हाले ३६४ कानुन व्यवसायी रहेकाले छोटो बहस गर्नुपर्ने सुझाव दिएका थिए । कानुन व्यवसायीहरूले लामो समय लिँदा मुद्दामा बहस लम्बिने देखिएको छ ।
इजलासले कुन कानुन व्यवसायीलाई कति समय दिने भन्ने निर्धारण गरेको छैन भने कानुन व्यवसायीले पनि बढीभन्दा बढी समय लिइरहेका छन् । त्यसले गर्दा मुद्दा टुंग्याउन समय लाग्ने देखिएको हो ।
प्रतिनिधिसभा विघटनका मुद्दामा दोस्रोदिनसम्म वरिष्ठ अधिवक्ताले बहसमा सहभागिता जनाएका छैनन् । पुस ५ गते प्रतिनिधिसभा विघटन भएको थियो । त्यसविरुद्ध १३ रिट निवेदन परेका छन् ।