सेती अञ्चल अस्पतालको नया बन्ने भवनको निर्माण सम्झौता भएको डेढबर्षपछि मात्रै निर्माण कार्य शुरु गरिएको छ ।
टेण्डर पारित भएर साढेतीन बर्षभित्र निर्माण सम्पन्न गरिसक्ने गरी सम्झौता गरेको निर्माण कम्पनीले डेढ बर्ष पछि काम शुरु गरेको छ ।
निर्माण कम्पनीले गरिरहेको कामप्रति अस्पताल प्रशासन सन्तुष्ट र शहरी विकास तथा भवन निर्माण कार्यालय असन्तुष्ट जनाएका छन ।
२०७७ बैशाख सम्ममा निर्माण सम्पन्न गरी सेती अञ्चल अस्पताललाई हस्तान्तरण गरिसक्नुपर्ने निर्माण सम्झौतामा उल्लेख छ । निर्माण कम्पनी रबिना एण्ड थेगिम जेभीले हालसम्म पाँच प्रतिशत मात्रै निर्माण कार्य गरेको छ । अस्पतालको आकस्मिक कक्ष भन्दा पश्चिमपट्टि निर्माण भइरहेको सो भवनमा पाँच वटा ब्लक बन्नुपर्ने छन् । अंग्रेजी एल अक्षरको आकारमा निर्माण हुने सो भवनमा सम्झौता अनुसार आजको मिति सम्म ३० प्रतिशत काम पुरा भइसक्नुपर्ने हो । निर्माणको ठेक्का पाएको कम्पनीले काम शुरु गर्न कुनै सुरसार नगरेपछि शहरी विकास तथा भवन निर्माण बिभागको संघीय कार्यान्वयन इकाइले पत्र पठाएपछि एक महिना अघि मात्रै काम शुरु गरेको छ ।
१८ करोड ७४ लाख मा ठेक्का कबोल गरेको सो कम्पनीले नियम अनुसार पाइने मोबिलाइजेसन पेश्की लिएको छ । नियम अनुसार यस्तो पेश्की सम्पूर्ण ठेक्का रकमको १० प्रतिशत हुन्छ ।
शहरी विका कार्यालयले पेश्की लिन पूर्व निर्माण कमपनीले पेश गरेको बैंक ग्यारेण्टीको रकम फिर्ता लिने भन्दै एक महिना अघि पत्र पठाएपछि मात्रै उसले काम शुरु गरेको हो । कम्पीने शुरुमा केही काम गरे पनि अहिले फेरी गति सुस्त भएको शहरी विकास कार्यालयका सूचना अधिकारी इन्जिनियर श्याम बुढाथोकीले ठेकेदार कम्पनीको काम सन्तोषजनक नरहेको बताउनुभयो ।
समयमै भवन निर्माण सम्पन्न भए बिरामीको उपचारमा सहजता आउने अपेक्षा गरिरहेको अस्पताल प्रशासन पनि ठेकेदार कम्पनीको कामप्रति सन्तुष्ट छैन् । निर्माण कम्पनीको काम कछुवा गतिमा भइरहको भन्दै अस्पतालका मेडिकल सुपरिटेन्डेन्ट डा. हेमराज पाण्डेले ५ ब्लक बन्नुपर्नेमा जम्मा दुई ब्लकमा काम शुरु भएके बताउनुभयो ।
उहाँले एक ब्लकमा संरचनाको आकार आउने गरी जग सम्म निर्माण भएको र अर्को ब्लकका लागि खाडल मात्रै खनिएको जानकारी दिनुभयो ।
बिरामीको चाप अत्यधिक रहेको अस्पतालमा पूर्वाधार निर्माणको गति सुस्त भएका कारण सेवा सुविधाहरु थप गर्न समस्या भइरहको समेत डा. पाण्डेले बताउनुभयो ।