प्रतिनिधिसभा विघटनको निर्णय बदर भएपछि उपप्रधानमन्त्री ईश्वर पोखरेलले एक कविता सार्वजनिक गरेका छन् ।
सामाजिक सञ्जालमार्फत उनले सार्वजनिक गरेको कवितामा लामो यात्राका क्रममा आफूहरुले लड्दै उठ्दै हिँड्न सिकेको आशय प्रकट गर्दै केही असफलता हात लागेपनि जितिछाड्ने उद्घोष गरेका छन् ।
उनले कमजोरीले किचिएर नभएर त्यही कमजोरीलाई पराजित गर्दै लक्ष्यतर्फ अघि बढिरहने पनि आशय प्रकट गरेका छन् ।
उनको कविता यस्तो छः
यात्रा
लड्दै उठ्दै / लड्दै उठ्दै
हिंड्न सिकेका मानिसहरू ।
अनगिन्ती कमजोरीबाट
पाठ सिक्दै उठ्न सिकेका मानिसहरू ।
अनुभवका पाठशालामा
पढ्दै/ सिक्दै पोख्त बनेका मानिसहरू ।
अनेक लडाईंमा रगतपच्छे भएर पनि
बाँच्न सिकेका मानिसहरू ।
दुष्चक्र विरूद्धको लडाईंमा पनि
जित्छन् र जितिछाड्छन् मानिसहरू ।
कमजोरीमा किचिएर होइन -
कमजोरीलाई पराजित गर्दै
गन्तव्य लक्षित बनेर हिंडिरहन्छन् मानिसहरू -
चिरन्जिवी बनिछाड्छन् मानिसहरू !!