पहिलो पटक आयोजना भएको नेपाल सुपर लिग (एनएसएल) मा आज आइतबार दुई खेल हुँदैछन्। काठमाडौको दशरथ रगंशालामा हुने पहिलो खेलमा धनगढी एफसी (फुटबल क्लब) र विराटनगर सिटी एफसीबीच प्रतिस्पर्धा हुँदैछ।
धनगढीको कप्तानी किरण चेम्जोङ र विराटनगरको कप्तानी रेजिन धिमालले सम्हाल्नेछन्।
आजको खेलमार्फत किरण पाँच वर्षपछि घरेलु लिगका फर्कदैछन्। आजै हुने दोस्रो खेलमा पोखरा थन्डर्स र बुटवल लुम्बिनी एफसी खेल्नेछन्। खेल सोही मैदानमा अपरान्ह साढे ५ बजे सुरु हुनेछ।
पोखराको कप्तानी अनिल गुरुङ र बुटबल लुम्बिनीको नेतृत्व बिशाल श्रेष्ठले गर्नेछन्। नेपाल स्पोर्टस म्यानेजमेन्टको आयोजना तथा अखिल नेपाल फुटबल संघको प्राविधिक सहयोगमा जारी लिगमा ७ शहरका ७ टोलीको सहभागिता रहेको छ।
लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी छन्।
राउण्ड रोबिनको आधारमा हुने यो लिग १ जेठसम्म चल्नेछ। प्रतियोगिताको विजेताले ३५ लाख तथा उपविजेताले १५ लाख रुपैयाँ हात पार्नेछन्। व्यक्तिगत विधातर्फका उत्कृष्टले जनही १ लाख तथा उत्कृष्ट युवा खेलाडीले पनि १ लाख रुपैया प्राप्त गर्नेछन्।