अछामको तुर्माखाँद गाउँपालिकाको कार्यालय स्थानीय तहको निर्वाचन सम्पन्न भएदेखि नै भाडाको घरबाट सञ्चालन भइरहेको छ । वडा नम्बर २, ४, ५, ६, ७ र ८ को कार्यालय पनि भाडाकै घरमा छन् । गाउँपालिकाले घरभाडाबापत मात्रै वर्षमा आठ लाखभन्दा बढी रकम खर्च गर्ने गरेको छ ।
यस्तै, पञ्चदेवल विनायक नगरपालिकाका प्रमुख देवराज देवकोटा र उपप्रमुख अम्बिका चलाउनेको कार्यकक्ष इलाका वन कार्यालयको भवनमा छ । साबिक विनायक गाविसको पुरानो भवनबाट नगरपालिकाको प्रशासनिक काम हुँदै आएको छ । नौवटा वडामध्ये वडा नम्बर ६ र ७ बाहेक सबै वडा कार्यालयले भाडाकै घरबाट सेवा दिइरहेका छन् ।
ढकारी गाउँपालिकाले पशु, स्वास्थ्य, शिक्षा, कृषि, खेलकुद र महिला तथा बालबालिका शाखा सञ्चालनका लागि निजी घर भाडामा लिएको छ । साँघुरो घरमा बसेर सेवा दिनुपर्दा कर्मचारीलाई समस्या भइरहेको प्रमुख प्रशासकीय अधिकृत टेकबहादुर वलीले बताए । यो गाउँपालिकाको वडा नम्बर ४ र ६ आफ्नो भवन छन् । त्यसबाहेक अन्य वडा कार्यालय भाडाकै घरमा सञ्चालित छन् । ढकारीले भाडाकै लागि वार्षिक सात लाख रुपैयाँ खर्च गर्ने गरेको छ ।
तुर्माखाँद गाउँपालिका, पञ्चदेवल विनायक नगरपालिका र ढकारी गाउँपालिकाजस्तै अछामका अन्य सातवटा स्थानीय तहमा पनि आवश्यक भौतिक संरचना नहुँदा भाडाको घरबाट सेवा दिनुपर्ने बाध्यता छ । जसका कारण कर्मचारी र सेवाग्राही दुवैलाई सास्ती भइरहेको तुर्माखाँद गाउँपालिकाका अध्यक्ष पुष्पराज शर्माले बताए ।
यस्तै, मल्लेख गाउँपालिकाले पनि जनता उच्च माविको भवनबाट कार्यालय सञ्चालन गर्दै आएकोे जनाएको छ । ‘क्याम्पसको भवनमा गाउँपालिकाको कार्यालय राखेका छौँ । विषयगत शाखाहरूले पनि यही भवनबाट सेवा दिइरहेका छन्,’ मल्लेखका अध्यक्ष लोकबहादुर बोहराले भने ।
मंगलसेन र साँफेबगर नगरपालिका तथा चौरपाटी र रामारोशन गाउँपालिकामा समेत पर्याप्त भौतिक संरचनाको अभावले सेवा प्रवाहमा समस्या भइरहेको छ । साभार : नयाँपत्रिका