वीरगञ्जस्थित ‘नारायणी वयोधा अस्पताल’ गैर कानूनी रुपमा सञ्चालनमा रहेको खुलासा भएको छ । शहरी विकास मन्त्रालयले अस्पताल सञ्चालनका लागि बनाइएको भवन मापदण्ड अनुरुप रहेको वा नरहेको सम्बन्धमा सिफारिस गर्नुपर्नेछ, तर हालसम्म ‘नारायणी वयोधा अस्पिटल’को संरचना मापदण्ड अनुरुप नभएको कोरण सिफारिस गरेको छैन ।
नारायणी वयोधा हस्पिटल प्रालिद्वारा सञ्चालित सो अस्पतालले हेलिप्याड बनाएको भएतापनि ‘एरोड्रम अथोरिटी’ले अनुमति नदिएको कारण हालसम्म कुनै पनि हेलिकप्टर त्यहाँ अवतरण भएको छैन । यता नारायणी अस्पतालका मेडिकल सुपरिटेन्डेन्ट डा. विरेन्द्र प्रधानले पनि ‘नारयणी वयोधा अस्पताल’ले सञ्चालनको अनुमति नपाएको कागजातले पुष्टि गरेको बताएका छन् ।
त्यस्तै, अस्पतालका सञ्चालक अशोक वैद्यले समेत अस्पताल सञ्चालनको अनुमति प्रक्रियामा रहेको बताउदै विस्तृत जानकारीका लागि सीडीओ कार्यालयमा सम्पर्क गर्न भनेका छन् । सञ्चालक बैद्यको भनाइ अनुसार पनि ‘नारायणी वयोधा अस्पताल’ गैर कानूनी रुपमा सञ्चालनमा रहेको थप पुष्टि भएको छ ।
तर, पर्साका प्रमुख जिल्ला अधिकारी पिताम्बर घिमिरेले भने यसबारे नोटिस आफूलाई नभएको बताएका छन् । साथै उनले मन्त्रालयसँग सोधेर जवाफ फर्काउने बताएका छन् ।
यसरी अस्पताल सञ्चालनको अनुमति नै नपाएको नारायणी वयोधा अस्पिटलमा उपचारका क्रममा १६ जना संक्रमितले ज्यान गुमाइसकेका छन् । अनुमति नै नपाएको अस्पतालमा कुनै पनि नागरिकको मृत्यु भएको खण्डमा ज्यान मुद्दा लाग्ने अधिवक्ताहरुको भनाइ छ ।
के अब गैर कानूनी रुपमा सञ्चालनमा रहेको नारायणी वयोधा अस्पिटलमा उपचारका क्रममा ज्यान गुमाएका १६ जनाले न्याय पाउलान् त ? अहिले यो जनचासोको विषय बनेको छ ।
त्यसोत, ‘मल्टी स्पेसलिस्ट’ डाक्टरहरुको टिमले सञ्चालनमा ल्याएका ‘नारायणी वयोधा अस्पताल’को लापरवाहीका कारण कोरोना संक्रमितको ज्यान जानुका साथै पाँच जना चिकित्सकहरुमा पनि संक्रमण पुष्टि भएको थियो ।
वीरगञ्ज महानगरपालिकाको स्वास्थ्य महाशाखाले केही दिन अगाडि मात्रै नारायणी वयोधा अस्पतालको अनुगमन समेत गरेको थियो । तर, मेयर विजय कुमार सरावगीको दबाबका कारण आवश्यक कारवाही प्रक्रिया अगाडि बढाउन नसकिएको बताइएको छ ।
यसअघि स्वास्थ्य सेवा विभागको उपचारात्मक सेवा महाशाखाकी निर्देशक डा.मनिषा रावलले मिति २०७६/२/२० मा ‘नारायणी वयोधा अस्पताललाई आवश्यक प्रक्रियामा रहेको भन्दै पत्र पठाएकी थिइन् । त्यसपछि पनि अस्पतालका सञ्चालकहरुले पत्रकार सम्मेलन गरेर विभिन्न बैंकसँग सम्झौता गरी उपचारमा भारी छुट दिने प्रचारबाजी समेत गरेका थिए ।