नेकपा एमाले एकता कार्यदलको बैठक अहिले सिंहदरबारस्थित अर्थ मन्त्रालयमा सुरु भएको छ । बैठक सुरु हुनुअघि एमालेका नेता भीम रावल नेता माधव नेपाललाई भेट्न उहाँकै निवास कोटेश्वर पुग्नुभएको थियो ।
कार्यदलको आजको बैठकमा आफ्नो पक्षबाट प्रस्तुत हुने रणनीतिका लागि छलफल गर्न रावलले नेपाललाई भेटेको बताइएको छ ।
हिजो(बुधबार) बेलुका अध्यक्ष एवं प्रधानमन्त्री केपी शर्मा ओली र नेता नेपालबीच एक्ला एक्लै भएको भेटवार्तामा उहाँहरू बीच भएको छलफलका बारेमा नेता रावलले नेपालसँग जानकारी लिनुभई सोही अनुसार आजको कार्यदल बैठकमा नेपाल पक्ष प्रस्तुत हुने बुझिएको छ ।
अध्यक्ष ओली र नेता नेपालबीच हिजो भएको छलफल सकारात्मक भएको कार्यदलका सदस्यहरूले बताउनुभएको थियो ।