मदन पुरस्कार गुठीले शुक्रबार ‘मदन पुरस्कार–२०७७’को लागि नौं पुस्तकको श्रेष्ठका सूची सार्वजनिक गरेको छ ।
गुठीका अध्यक्ष कुन्द दीक्षितले शुक्रबार विज्ञप्तीमार्फत पुरस्कारका लागि गिरि श्रीस मगरको ‘एकलव्यको देब्रे हात’, कृष्ण अविरलको ‘करिया’, कुमार नगरकोटीको ‘कल्प–ग्रन्थ’, भैरवबहादुर थापाको ‘नृत्याक्षर विज्ञान’, प्रभा बरालको ‘फिलिङ्गो’, लेखनाथ क्षेत्रीको ‘फुलाङ्गे’, केशव दाहालको ‘मोक्षभूमि’, जेसन कुँवरको ‘रमिते’ र भगिराज इङ्नामको ‘लिम्बुवानको ऐतिहासिक दस्तावेज संग्रह सम्वत् १७१९–२०२०’ छनोंट भएको जानकारी दिएका छन् ।
दीक्षितका अनुसार पुरस्कारको लागि गुठीलाई २ सय २२ पुस्तकहरु प्राप्त भएका थिए । ‘यी पुस्तकहरुमध्येबाट बढीमा १० पुस्तकहरुको श्रेष्ठ सूची तयार गर्न कठिन भएको समितिले गुठीलाई ९ पुस्तकको नाम उपलब्ध गराएको थियो’, विज्ञप्तीमा लेखिएको छ, ‘गुठीको नियमानुसार अप्रकाशित सामाग्रीहरुको बाहुल्य रहेका पुस्तकलाई छनोंटको एउटा आधार बनाइएको थियो ।’
यी नौमध्येबाट एक पुस्तकले ‘मदन पुरस्कार २०७७’ पाउने गुठीले जनाएको छ ।