दार्चुला । दार्चुलामा महाकाली नदीमा तुइन तर्ने क्रममा जयसिंह धामी बेपत्ता भएको घटनाबारे थप अनुसन्धानका लागि प्रत्यक्षदर्शी तीन जनालाई सोमबार जिल्ला सदरमुकाम खलंगा झिकाइएको छ । दार्चुलाका सहायक प्रमुख जिल्ला अधिकारी ज्योत्सना भट्ट जोशीका अनुसार तुइन तर्दै गर्दा देख्ने तीनजना प्रत्यक्षदर्शीलाई जिल्ला प्रशासन कार्यालयमा झिकाइएको हो ।
यसअघि सशस्त्र प्रहरीका डिएसपीको नेतृत्वमा एउटा टोली र नेपाल प्रहरीका इन्सपेक्टरको नेतृत्वमा अर्को टोली घटनास्थल पुगेर घटनाको बारेमा अध्ययन अनुसन्धान गरेको थियो । दार्चुलाको व्यासबाट भारतको पिथौरागढको बाटो हुँदै जिल्ला सदरमुकाम जान लागेका स्थानीय ३३ वर्षीय धामी शुक्रबार बेपत्ता भएका थिए ।
अस्थायी तुइनबाट पिथौरागढको बाटो हुँदै सदरमुकाम जान लागेका उनलाई तुइन तर्दै गर्दा भारतीय सीमा सुरक्षा बल एसएसबीले तुइन काटिदिएर ‘हत्या’ गरिदिएको आरोप लागेको छ । स्थलगत अध्ययनमा भारतीय सुरक्षाकर्मीले तुइन काटिदिएको हो कि होइन, धामी नदीमै डुबेर बेपत्ता भएको हो कि होइन भन्ने खुलेको छैन ।
प्रत्यक्षदर्शीले भने तुइननजिकै हातमा आरा लिएका भारतीय सीमा सुरक्षा बल एसएसबीका जवानहरू बसेको देखेको र उनीहरुले नै तुइन काटिदिएको हुनसक्ने दाबी गर्दै आएका छन् । तुइन काटिएको सम्बन्धमा भारतीय सीमा सुरक्षा बल एसएसबीले अनभिज्ञता जनाउँदै आफ्नो संलग्नताबारे इन्कार गरी सकेको छ ।
घटनालाई नजिकबाट देखेका व्यक्तिलाई सदरमुकाम बोलाइएको दार्चुलाका सहायक प्रमुख जिल्ला अधिकारी ज्योत्सना भट्टले जानकारी दिइन् ।