स्वचालित (अटोमेटिक) पेस्तोलसहित दुई भारतीय नागरिक पक्राउ परेका छन्। दाङ प्रहरीले पेस्तोलसहित सोमबार साँझ दुई जनालाई पक्राउ गरेको हो।
पक्राउ पर्नेहरूमा भारत सिद्धार्थनगर नगरपञ्चायत बढनी–३ का २२ वर्षीय करमुल्लाह आमिर र सोही ठाउँ बढनी–८ का १९ वर्षीय राजा खान रहेका छन्। प्रहरीले उनीहरुको साथबाट सिल्भर कलरको स्वचालित पेस्तोल १ थान, त्यसको २ थान म्यागजिन, २ राउण्ड गोली र ३ थान मोबाइल बरामद गरेको छ।
उनीहरुलाई गढवा गाउँपालिका–१ जुरौलीस्थित पूर्वपश्चिम राजमार्गबाट पक्राउ गरिएको हो। जिल्ला प्रहरी कार्यालय दाङ र अस्थायी प्रहरी पोष्ट कालाकाटेबाट खटिएको टोलीले उनीहरुलाई नियन्त्रणमा लिएको हो।
हतियार लिएर उनीहरु किन नेपाल प्रवेश गरे भन्नेबारे अहिलेसम्म यकिन हुन सकेको छैन । उनीहरु दुवैमाथि हातहतियार तथा खरखजना कसूरमा म्याद लिएर प्रहरीले अनुसन्धान सुरु गरेको छ।