पपुवा न्यू गिनी (पीएनजी) विरुद्ध दोस्रो एकदिवसीय अन्तर्राष्ट्रिय (ओडीआई)मा नेपालले टस जितेर ब्याटिङ रोजेको छ । ओमान र अमेरिकासँग विश्वकप लिग २ को श्रीङ्खला खेल्न ओमानमा रहेको नेपालले त्यसैको तयारी स्वरुप पीएनजीसँग दुई वटा ओडीआई खेलेको हो ।
आज नेपालले पहिलो पटक डे–नाइट ओडीआई खेल्दैछ। खेल नेपाली समयअनुसार अहिले सवा ४ बजे खेल सुरु हुनेछ। यसअघि नेपालले ११ वटा ओडीआई दिउँसो मात्र खेलेको थियो । १२औँ ओडीआई पहिलो पटक फ्लड लाइटमा खेल्न लागेको हो ।
नेपालले यसअघि टी–२० आई मात्र फ्लड लाइटमा खेलेको थियो। सन् २०१४ मा बंगलादेशमा भएको टी–२० विश्वकपमा नेपालले पहिलो पटक फ्लडलाइटमा खेलेको थियो । नेपालले १३ सेप्टेम्बरदेखि खेल्ने विश्वकप लिग २ श्रीङ्खलाका सबै चार खेल डे–नाइट हुनेछन्। नेपालले ओमान र अमेरिकासँग गरी जम्मा चार खेल खेल्नेछ।
यसअघि पीएनजीसँग भएको पहिलो खेलमा नेपाल दुई विकेटले विजयी भएको थियो। पीएनजीले दिएको १३५ रनको लक्ष्य पूरा गर्न नेपालले आठ विकेट खर्च गरेको थियो।