नेकपा एमालेको विधान महाधिवेशनमा आज प्रतिवेदनमाथि समूहगत छलफल चलिरहेको छ ।
अध्यक्ष केपी शर्मा ओलीको राजनीतिक प्रतिवेदन, महासचिव ईश्वर पोखरेलको साङ्गठानिक प्रतिवेदन र उपमहासचिव विष्णु पौडेलको विधान संशोधन प्रस्तावमाथि विभिन्न १० समूहमा छलफल भइरहेको एमालेका केन्द्रीय सदस्य तथा प्रचार उपसमिति संयोजक खिमलाल भट्टराईले जानकारी दिनुभयो ।
प्रदेश-१ को समूहको सहजीकरण सुवास नेम्वाङ र भीम आचार्य, प्रदेश-२ को सत्यनारायण मण्डल र रघुवीर महासेठ, वाग्मती प्रदेशको अष्टलक्ष्मी शाक्य र रामबहादुर थापा, गण्डकी प्रदेश समूहको सहजीकरण पृथ्वीसुब्बा गुरुङ र किरण गुरुङ तथा लुम्बिनी प्रदेश समूहको सहजीकरण विष्णु पौडेल र शङ्कर पोखरेलले गर्नुभएको छ ।
यस्तै कर्णाली प्रदेश समूहको सहजीकरण युवराज ज्ञवाली र यामलाल कँडेल, सुदूरपश्चिम प्रदेश समूहको सहजीकरण भीम रावल र लेखराज भट्ट, उपत्यका विशेष कमिटी, सम्पर्क समन्वय कमिटी र प्रवास क्षेत्रबाट आएकाको समूहको सहजीकरण छविलाल विश्वकर्मा र राजन भट्टराई, जनसङ्गठनको समूहको सहजीकरण गोकर्ण विष्ट र टोपबहादुर रायमाझी, केन्द्रीय निकाय तथा केन्द्रीय विभाग समूहको सहजीकरण अमृत बोहरा र पुष्प कँडेलले गर्दै हुनुहुन्छ ।
समूहगत छलफल सकिएपछि दिउँसो समूह नेताले प्रतिवेदनमाथि सुझाव पेस गर्नुहुनेछ । ती सुझावका आधारमा भोलि राजनीतिक प्रतिवेदनमा अध्यक्ष ओली, साङ्गठानिक प्रतिवेदनमा महासचिव पोखरेल र विधान संशोधन प्रस्तावमा उपमहासचिव पौडेलले जवाफ दिनुहुनेछ ।