आईसीसी ट्वान्टी–२० विश्वकप क्रिकेट सुरु हुनुअघि उपाधिका लागि सबैभन्दा बलियो दाबेदार मानिएको भारत यति बेला समूह चरण पार गर्नका लागि संघर्ष गरिरहेको छ ।
भारतले लिग चरणको अन्तिम खेलमा भोलि नामिबियाविरुद्ध खेल्दै छ । तर, भारत विश्वकपको फाइनलमा पुग्ने नपुग्ने टुंगो आजै लाग्नेछ, न्युजिल्यान्ड र अफगानिस्तानबीचको खेलले ।
न्युजिल्यान्ड र अफगानिस्तानबीचको खेलले आज तीन टोलीको सेमिफाइनल पुग्ने सम्भावना टुंगाउनेछ, न्युजिल्यान्ड, अफगानिस्तान र भारतको ।
सुपर–१२ मा समूह १ बाट इंग्ल्यान्ड र अष्ट्रेलियाले आईसीसी ट्वान्टी–२० विश्वकपको सेमिफाइनलमा स्थान बनाएपछि अब सबै क्रिकेटप्रेमीको ध्यान समूह २ मा केन्द्रित भएको छ । अझ भारत सेमिफाइनल पुग्ने नपुग्नेबारे सबैको चासो छ ।
भारत पहिलो खेलमा चिरर प्रतिद्वन्द्वी पाकिस्तानसँग हारेपछि सबैले चनाखोपूर्वक भारतलाई नियालिरहेका छन् । दोस्रो खेलमा न्युजिल्यान्डसँग हारेपछि भारतको खेललाई अझ चासोपूर्वक हेरिएको छ ।
आज आबुधावीस्थित जायद क्रिकेट मैदानमा नेपाली समयानुसार पौने ४ बजे न्युजिल्यान्ड र अफगानिस्तानबीच हुने खेलको नतिजाले भारतको पनि यात्रा निर्धारण गर्नेछ । यस समूहबाट चार खेलमा शतप्रतिशत नतिजा निकालेको पाकिस्तानले यसअघि नै अन्तिम चारमा स्थान बनाइसकेको छ । अब सेमिफाइनल पुग्ने एक स्थानका लागि तीनको प्रतिस्पर्धा छ ।