बझाङ । बझाङमा हिरासतभित्रै ७७ वर्षीया एक वृद्धाको मृत्यु भएको छ । केदारस्युँ गाउँपालिका–२ महर गाउँकी कृष्णादेवी रावलको शनिबार बिहान जिल्ला प्रहरी कार्यालय बझाङको हिरासतमै मृत्यु भएको हो ।कर्तव्य ज्यान मुद्दामा २० कात्तिकदेखि हिरासतमा रहेकी रावलको मृत्यु भएको डिएसपी ज्ञानबहादुर विष्टले बताए ।
‘बिहान हिरासतभित्र सुरक्षाकर्मीलगायत हिरासतमा रहेकाहरू चिया पिइरहेका थिए, उहाँ पनि चिया पिउँदै हुनुहुथ्यो, चिया पिउँदापिउँदै एक्कासि अचेत हुनुभयो,’ डिएसपी विष्टले भने,‘अचेत भएपछि जिल्ला अस्पताल पठायौं र अस्पतालले मृत घोषणा गर्यो ।’
मृतक रावल र उनका छोरा जयबहादुर बुहारी हत्याको आरोपमा २० कात्तिकदेखि हिरासतमा थिए ।